Moskwa şäherinde M.I.Rudomino adyndaky daşary ýurt edebiýaty kitaphanasynda Türkmenistanyň Bitaraplygynyň 30 ýyllygy mynasybetli Türkmenistanyň Russiýa Federasiýasyndaky ilçihanasynyň guramagynda kitap sergisi geçirildi.

26-njy martda geçirilen çärä kitaphananyň ýolbaşçylary, Russiýa Federasiýasynda akkreditirlenen daşary ýurtlaryň diplomatlary, meşhur dilçiler we edebiýatşynaslar, alymlar we medeniýet ulgamynyň işgärleri, žurnalistler we türkmen talyplary gatnaşdylar. Bu barada Türkmenistanyň Moskwadaky ilçihanasy habar berdi.

Çäräniň çäginde Türkmenistanyň Halk Maslahatynyň Başlygy Gurbanguly Berdimuhamedowyň türkmen halkynyň ruhy gymmatlyklaryny nygtaýan «Ýaşasyn parahat durmuş!», «Jan Watanym Türkmenistan!», «Pähim-paýhas ummany Magtymguly Pyragy» atly şygyrlaryndan setirler okaldy.

Bellenilişi ýaly, Türkmenistanyň Prezidentiniň we türkmen halkynyň Milli Lideriniň Türkmenistanyň parahatçylyk söýüjilikli daşary syýasatynyň esasy taraplaryny açyp görkezýän eserleri sergide aýratyn orun eýelediler.

Myhmanlar türkmen Bitaraplygynyň 30 ýyllygyna bagyşlanan tematiki wideoşekiller bilen tanyşdylar we bu möhüm sene mynasybetli 2025-nji ýylyň dekabrynda geçiriljek esasy halkara foruma taýýarlyk barada pikir alyşdylar.

Çäräniň ahyrynda Türkmenistanyň Prezidentiniň hem-de türkmen halkynyň Milli Lideriniň eserleri kitaphananyň gaznasyna sowgat edildi.