24-nji martda Türkmenistanyň Prezidenti Gurbanguly Berdimuhamedow Ministrler Kabinetiniň nobatdaky mejlisini geçirdi. Onda mähriban halkymyzyň abadançylygyny üpjün etmäge gönükdirilen döwletimiziň içeri syýasatyna degişli möhüm meseleleriň birnäçesi ara alnyp maslahatlaşyldy hem-de birnäçe resminamalaryň taslamalaryna seredildi.
Mejlisde
ykdysady, maliýe we bank ulgamlarynyň öňümizdäki ýedi ýyl üçin ösüş maksatnamasynyň taýýarlanylyşy;
milli parlamentiň ýurdumyzda amala aşyrylýan durmuş-ykdysady özgertmeleriň hukuk üpjünçiligi boýunça alyp barýan işleri;
Eýran Yslam Respublikasynyň Prezidentiniň 27 — 28-nji martda ýurdumyza boljak resmi saparyna görülýän taýýarlyk;
27-nji martda geçirilmegi meýilleşdirilýän türkmen-eýran işewürler maslahatyna görülýän taýýarlyk;
29 — 31-nji martda Türkmenistanyň Söwda-senagat edarasynda Özbegistan Respublikasynyň milli senagat sergisini geçirmäge görülýän taýýarlyk;
ýurdumyzyň nebitgaz toplumynda işleýän daşary ýurtly kompaniýalar bilen önümi paýlaşmak hakynda ylalaşyk şertlerinde ýola goýulýan hyzmatdaşlygy giňeltmek bilen baglanyşykly meseleler;
welaýatlarda möwsümleýin oba hojalyk işleriniň barşy;
innowasion önümçilik düzümini döretmegiň, bäsdeşlige ukyply önümleriň möçberini artdyrmagyň wezipelerini çözmek boýunça alnyp barylýan işler;
Garlyk kaliý dag-magdan toplumyna bolan iş saparynyň netijeleri;
gurluşykda milli çykdajy-ölçeg binýadyny işläp taýýarlamak, nyrh emele getirmek ulgamyny kämilleşdirmek boýunça alnyp barylýan işler;
oba hojalyk tehnikalaryny we gurallary satyn almak, dürli görnüşli ýük wagonlaryny abatlamak boýunça Özbegistan Respublikasy bilen hyzmatdaşlygyň çäklerinde amala aşyrylýan işler;
Awtomobil ulaglary ministrliginde awtoulag kärhanalar toplumyny we awtomobil mekdepleriniň birleşiginiň okuw-türgenleşik merkezini gurmak üçin şertnama baglaşmaga ygtyýar almak boýunça alnyp barylýan işler;
medeniýet ulgamynda ozal gol çekilen halkara ylalaşyklaryň ýerine ýetirilişi;
Sport we ýaşlar syýasaty ministrliginiň edara binasynyň hem-de Milli sport we syýahatçylyk institutynyň sportuň olimpiýa görnüşleri fakultetiniň binasynyň durkuny täzelemek boýunça halkara bäsleşigiň netijeleri;
28-nji oktýabr — 10-njy noýabr aralygynda Aşgabatda agyr atletika boýunça dünýä çempionatyny geçirmäge görülýän taýýarlyk;
orta mekdepleriň, başlangyç, orta hünär okuw hem-de ýokary okuw mekdepleriniň okuw meýilnamalaryna girizilen üýtgetmeler, hünärmenleri ýokary hünär biliminiň iki basgançakly düzüm boýunça taýýarlamak bilen baglylykda taýýarlanylan bilim hakynda resminamalaryň täze döwlet nusgalary barada hasabatlar berildi.