Şu gün Aşgabatda Belarus Respublikasynyň Türkmenistandaky Medeniýet günlerine badalga berildi. Onuň açylyş dabarasy agşamlyk Mukamlar köşgünde geçirildi. Sahnada Belarusyň döwlet akademiki tans topary, «Kupalinka» folklor topary we «Sýabry» wokal-instrumental ansamly çykyş etdi. Dabara gatnaşanlar meşhur belarus mukamlarynyň ençemesini diňlemäge mümkinçilik aldylar. Şeýle hem Belarusyň telegraf agentligi tarapyndan taýýarlanylan «Belarus — 2017» atly sergi ýaýbaňlandyryldy.
25-nji ýanwarda Döwlet kitaphanasynda iki ýurduň ýazyjylary duşuşar. Onda Döwlet kitaphanasyna «Fransiska Skoriniň kitap mirasy» gowşurylar.
Şol gün agşam sagat 18-de «Möjekler» atly belarus çeper filmi görkeziler. Medeniýet günleriniň jemleýji konsertinde belarus we türkmen sahna ussatlary bilelikde çykyş ederler. Bu dabara 26-njy ýanwarda geçiriler.
Aşgabadyň Belarusly myhmanlary üçin baý medeni çäreler göz öňünde tutuldy. Türkmen paýtagtynda bolmagyň çäklerinde myhmanlar şäheriň gözel ýerlerine, taryhy ýadygärliklere we muzeýlere baryp görerler.
