“Aşgabat 2017” oýunlarynyň sportuň bilýard görnüşi boýunça ýaryşlary dowam edýar . Erkekleriň arasynda bilýard oýnunyň rus piramidasy erkin usul, 9 şar pul bilýardy, 6 gyzyl şarly snuker, 3 karambol şahsy ýaly görnüşleri boýunça geçirilen ýaryşlar örän gyzykly boldy. Ýeri gelende, bu oýunlaryň 26-njy sentýabra çenli dowam etjekdigini bellemeli. Biz hem bu oýunlara gatnaşyp, ýaryşyň guramaçylygy hakynda gürrüň bermegini haýyş edip, Aziýanyň bilýard sporty boýunça Konfederasiýasynyň wekiline ýüz tutduk.
—Jenap Josep Lo, ilki bilen sizi ýene bir ýola paýtagtymyzda hoş gördük. Söhbetdeşligimiziň başynda Konfederasiýanyň işi hakynda gürrüň beräýseňiz.
—Aziýanyň bilýard Konfederasiýasy 1984-nji ýylda 8 döwletiň howandarlygynda döredildi. Konfederasiýa Aziýa sebitinde bilýard oýunlaryny dolandyrmak bilen meşgullanýar. Onuň esasy maksady Aziýada sportuň bilýard görnüşini ösdürmek, halkara ýaryşlarynyň üsti bilen sebitiň ýurtlaryny we halklaryny dostlaşdyrmak bolup durýar.
—Ine, şu gün Ýapyk binalarda we söweş sungaty boýunça V Aziýa oýunlarynyň sportuň bilýard görnüşleri boýunça ýaryşlaryna badalga berildi. Halkara bilermen hökmünde oýunlaryň guramaçylygyna nähili baha berýärsiňiz?
— Türkmenistan bu oýunlaryň geçirilmegi üçin örän köp tagallalary etdi. Edilen işler özüniň ajaýyp netijesini hem berdi. Olimpiýa şäherçesi, ondaky sport toplumlary örän ýokary derejede gurlan. Ine, şu wagt bilýard oýnuna tomaşa edip otyrys. Oýunlaryň guramaçylykly geçirilmegi üçin ähli mümkinçilikler döredilen. Ähli zatlar halkara standartyna doly laýyk gelýär. Men öz iş tejribämiň dowamynda köp sanly halkara ýaryşlaryna gatnaşdym. Bu oýunlaryň Aziýanyň taryhynda iň gowy oýunlaryň biridigini bellemek isleýärin. Pursatdan peýdalanyp,
bu ugurda alnyp barlan işler üçin Türkmenistanyň bilýard federasiýasyna köp sagbolsun aýdýaryn.
—Köp sag boluň, oýunlaryň geçirilişine berýän şeýle ýokary bahaňyzy eşitmek örän ýakymly. Belki-de “Aşgabat 2017-niň” açylyş dabarasyndaky täsirler bilen hem paýlaşarsyňyz.
—Biz edil ýaňyja hem kärdeşlerimiz bilen bu hakynda gürrüň etdik. Dabaranyň ajaýyplygyny söz bilen beýan eder ýaly däl. Örän üýtgeşik görnüşler. Görkezilen çykyşlar uzak wagtlap ýadymdan çykmasa gerek. Biz dabarada türkmeniň milliligini, baý geçmiş taryhyny, şu günki ýeten derejelerini gördük. “Aşgabat 2017-niň” açylyş dabarasyny, oýunlaryň guramaçylyk derejesini synlap hem, ýurduň gazananlaryna baha berip bolar.
—Aziýanyň bilýard sporty boýunça Konfederasiýasynyň wekili hökmünde türgenlere etjek arzuwlaryňyz.
—Bilýard sporty boýunça, şeýle-de “Aşgabat 2017-ä” gatnaşýan ähli türgenlere üstünlik arzuw edýärin. Goý, olar öz öňlerinde goýan maksatlaryna ýetsinler. Türkmenistana bolsa, bu ugurda mundan beýläk-de ösüşler hemra bolsun!
—Köp sag boluň jenap Lo, bizem size işleriňizde üstünlikleriň ýar bolmagyny arzuw edýäris.