Tapgyryň umumy aýratynlyklary:
«1-likleriň» berekedi: Tapgyrdaky ähli duşuşyklaryň netijelerine serediň, «1-likden» ýokary san görmersiňiz.
Utuklar: Dördünji tapgyrdan soň: «Ahal» 3/9, «Şagadam» 3/7, «Nebitçi» 4/6, «Altyn asyr» 2/4, «Köpetdag» 3/3, «Merw» 4/3, «Energetik» 3/3, «Aşgabat» 4/3.
Iň köp ýeňiş gazanan toparlar: «Ahal» 3, «Şagadam» 2, «Nebitçi» 2, «Altyn asyr» 1, «Köpetdag» 1, «Energetik» 1, «Aşgabat» 1, «Merw» 1.
Iň köp deňme-deň oýnan toparlar: «Şagadam» 1, «Altyn asyr» 1, «Merw» 0, «Energetik» 0, «Ahal» 0, «Aşgabat» 0, «Köpetdag» 0, «Nebitçi» 0.
Iň köp utulan toparlar: «Merw» 3, «Aşgabat» 3, «Nebitçi» 2, «Energetik» 2, «Köpetdag» 2, «Şagadam» 0, «Altyn asyr» 0, «Ahal» 0.
Iň köp pökgi geçiren toparlar: «Ahal», «Altyn asyr» ― 6, «Köpetdag» ― 5, «Nebitçi», «Şagadam», «Merw» ― 4, «Energetik» ― 2, «Aşgabat» ― 1.
25 golçy: Möwsümde tapawutlanan futbolçylaryň sanawyna şu tapgyrda 3 sany täze futbolçy goşuldy. Indi Ýokary liganyň 27-nji möwsüminde tapawutlananlaryň sany 25-e çykdy.
Bombardirleriň basgançagy: Myrat Ýagşyýew («Altyn asyr») ― 3 gol; Altymyrat Annadurdyýew («Altyn asyr»), Akmämmet Metdäýew («Nebitçi»), Nurýagdy Muhammedow («Köpetdag»), Didar Durdyýew («Ahal»), Bagtyýar Hojaahmedow («Merw») ― 2 gol.
4 duşuşykda 5 gol: Tapgyrda derwezelere 5 pökgi geçirildi. Dördünji tapgyr tutuş möwsüm boýunça-da iň az pökgi geçirilen tapgyrlaryň biri bolup biler. Häzir diňe ikinji tapgyrda 3 gol bar, ýöne şol tapgyryň iki duşuşygy heniz ätiýaçda dur.
Dört tapgyrda 32 gol: Şu tapgyrdan soň möwsümde geçirilen gollaryň sany 32-ä çykdy. Ortaça, her tapgyrda 8, her oýunçy 1,28 gol geçirdi.
Ýokary liganyň «weteranlary» 770-nji duşuşygyny geçirdi: Ýokary liga döredileni bäri ähli möwsümlerde ähli duşuşyklara gatnaşyp gelýän «Nebitçi» bilen «Merw» şu tapgyrda 770-nji duşuşygyny geçirdi. Ýubileý duşuşyk «nebitçilere» üstünlik getirse, «Merw» üçin şowsuz tamamlandy.
“Nebitçi” – “Köpetdag” – 1:0
Gol: Akmämmet Metdäýew 90+3 (“Nebitçi”)
Ýene goşmaça wagtda ýeňiş: Şu ýyl öz meýdanynda ikinji ýeňşini gazanan «Nebitçiniň» futbolçylary şol duşuşyklaryň ikisinde-de garşydaşlaryndan 1:0 hasaby bilen üstün çykdylar. Iki duşuşykdaky gol hem duşuşygyň goşmaça minutlarynda geçirildi. Ýadyňyzda bolsa, ikinji tapgyrda «Merw» bilen geçirilen duşuşykda hem pökgini 90+4-nji minutda Muhammet Astanow geçiripdi. Akmämmet Metdäýew bolsa bu gezek topardaşyndan 1 minut «öňürtiledi».
444: Dördünji tapgyrda emele gelen bu owadan san «Nebitçiniň» Ýokary ligada gazanan ýeňişleriniň sanydyr. «Köpetdagdan» üstün çykylyp gazanylan ýeňiş «nebitçileriň» Ýokary ligadaky 444-nji ýeňşi boldy. Ýeri gelende aýtsak, «Nebitçi» milli çempionatymyzda iň kän ýeňiş gazanan topardyr. Sanawyň ikinji basgançagynda 323 ýeňiş bilen «Merw», üçünji basgançakda bolsa 284 ýeňiş bilen «Köpetdag» bar. Ýokary liganyň häzirki lideri «Ahalda» 217, geçen möwsümde bassyr bäşinji çempionlygyny gazanan «Altyn asyrda» 203 ýeňiş bar.
“Aşgabat” – “Merw” – 1:0
Gol: 43 Güýçmyrat Annagulyýew (“Aşgabat”)
«Aşgabadam» utuk gazandy: Dördünji tapgyra çenli Ýokary liga ― 2019-da utuk gazanyp görmedik ýeke-täk topar «Aşgabatdy». Indi çempionatdaky 8 toparyň ählisinde azyndan 3 utuk bar.
Ýeňiş gazanyp görmedik topar galmady: Şu tapgyra çenli möwsümde ýeňiş gazanmadyk ýeke-täk topar «Aşgabatdy». Indi bolsa toparlarda azyndan 1 ýeňiş bar.
Annagulyýew perdäni açdy: Güýçmyrat Annagulyýew «Aşgabadyň» şu ýyldaky resmi duşuşyklarynda ilkinji bolup tapawutlanan oýunçydyr.
Utulyşlar deňleşdi: Şeýlelikde, şu duşuşykdan soňra «Aşgabat» bilen «Merwiň» utulyşlarynyň sany deňleşdi. Indi toparlaryň ikisinde-de 3 utulyş bar.
«Aşgabat» 600-nji utugyny gazandy: Şu tapgyrda gazanylan ýeňiş bilen «Aşgabat» Ýokary ligadaky 600-nji utugyny gazandy. Indi çempionatymyzda 600 utuga ýeten 9 topar bar. Olaryň tertip boýunça sanawy şeýle: «Nebitçi» ― 1403, «Merw» ― 1080, «Şagadam» ― 938, «Köpetdag» ― 878, «Nisa» ― 721, «Ahal» ― 708, HTTU ― 693, «Altyn asyr» ― 661, «Aşgabat» ― 600. 10-njy orundaky «Turan» Ýokary ligada çykyş eden ýyllarynda 546 utuk toplap bilipdi.
“Altyn Asyr” – “Şagadam” – 1:1
Gollar: 78 Murat Ýakşiýew (“Altyn Asyr”) – 18 Yhlas Magtymow (“Şagadam”)
Ilkinji deňlik: Şu duşuşyk Ýokary liganyň täze möwsüminde deňme-deň hasap bilen tamamlanan ilkinji duşuşykdyr.
Ýagşyýew birinji orunda: «Altyn asyryň» şu ýyl Ýokary ligada geçiren duşuşyklarynyň ikisinde-de tapawutlanan hüjümçi Myrat Ýagşyýew, häzirlikçe, 3 gol bilen bombardirlik sanawynyň birinji ornunda. Karýerasynda iki gezek bir möwsümde iň köp tapawutlanan futbolçy bolmagy başaran hüjümçi ýene-de ýaryşyň kerwenbaşysy. Ýöne, heniz, çaklamalar üçin ir, çünki ýaňy dördünji tapgyr tamamlandy.
“Ahal” – “Energetik” – 1:0
Gol: 67 Gurbanguly Aşyrow (“Ahal”)
«Ahal» utuk ýitirmedik ýeke-täk topar: Yzda galan dört tapgyrda üç duşuşyk geçiren «Ahal» Ýokary liga ― 2019-da utuk ýitirmedik ýeke-täk topardyr.
Ýeňişleriň sanynda-da öňde: «Ahal» yzda galan dört tapgyrda üç ýeňiş gazanan ýeke-täk topardyr.
