2025-nji ýylyň 11-nji ýanwaryndan başlap, Belarus bilen Russiýanyň arasynda wizalary özara ykrar etmek barada ylalaşyk güýje girýär. Resminama görä, ýurtlaryň birine girmek üçin wiza alan Türkmenistanyň raýatlary wizanyň hereket edýän möhletiniň dowamynda iki döwletiň çäklerinde giriş-çykyş, ýaşamak we üstaşyr geçmek hukugyna eýe bolarlar diýip, BELTA habar berýär.
Hakykatda bu, Belarus wizasyny alan türkmenistanlynyň goşmaça rugsatnama resmileşdirmezden Russiýa hem baryp biljekdigini aňladýar. Şeýle hem, Russiýa wizasy bilen Belarusa girmek mümkin bolar.
Ýurtlaryň arasyndaky serhetden geçmek üçin halkara gözegçilik-geçiriş nokatlary, şeýle hem alty sany ýörite kesgitlenen awtoulag marşrutlary, demirýol we howa gatnawlary ulanylyp bilner.
Şol bir wagtyň özünde, her ýurt daşary ýurt raýatlarynyň öz çägine girmegini ret etmek ýa-da olaryň ýaşaýyş möhletini gysgaltmak, şeýle hem ýaşaýyş düzgünleriniň berjaý edilişini barlamak hukugyny özünde saklaýar.
