4 - 6-njy dekabr aralygynda Moskwa şäherinde Çagalar we ýetginjekler üçin II halkara kitap forumy geçirildi. Forum Russiýanyň Döwlet çagalar kitaphanasy tarapyndan GDA-nyň Ynsanperwer hyzmatdaşlyk boýunça döwletara gaznasynyň goldaw bermeginde guraldy.
Forumyň esasy maksady medeni-ynsanperwer gatnaşyklary berkitmek, kitaphanalar üçin täze mümkinçilikleri we olaryň ýaş okyjylara hyzmat etmekdäki ornuny ara alyp maslahatlaşmakdan ybaratdyr. Bu çärä döwlet we milli kitaphanalaryň ýolbaşçylary, ýazyjylar, şeýle hem çagalar edebiýaty we kitaplar boýunça GDA ýurtlaryndan hünärmenler çagyryldy.
Foruma Türkmenistanyň Döwlet medeniýet merkeziniň Döwlet kitaphanasynyň hem-de B.Amanow adyndaky Döwlet çagalar kitaphanasynyň wekilleri gatnaşdylar. Olar bu ugurda Türkmenistanda alnyp barylýan işler barada maglumat berdiler.
Forum tejribe alyşmak, çagalaryň we ýetginjekleriň arasynda kitap okamagy ösdürmäge täze çemeleşmeleri ara alyp maslahatlaşmak üçin möhüm platforma bolup hyzmat etdi.
