Türkmenistanyň Döwlet gümrük gullugynyň merkezi edarasynda Ýaponiýanyň Maliýe ministrliginiň Gümrük we tarifler boýunça edarasynyň wekilleri bilen wideo aragatnaşyk ulgamy arkaly duşuşyk geçirildi. Duşuşygyň esasy maksady «Bir penjire» ulgamynyň tejribesini öwrenmekden ybarat boldy.
Gullugyň resmi saýtynda berilýän habara görä, duşuşygyň dowamynda Ýaponiýanyň gümrük edarasynyň hünärmenleri Türkmenistanda Gümrük gullugy tarapyndan ornaşdyrylan «Eksport-import amallary üçin bir penjire» ulgamynyň aýratynlyklary we ýerine ýetirýän wezipeleri bilen tanyşdyryldy.
Ýaponiýaly hünärmenler öz gezeginde «Gümrük maglumat ulgamy» hem-de «Bir penjire» ulgamlary boýunça öz tejribelerini paýlaşyp, bu ulgamlaryň ornaşdyrylyşy, ýerine ýetirýän wezipeleridir işleýiş tertibi boýunça giňişleýin gürrüň berdiler.
Taraplar duşuşygyň dowamynda degişli ugurlar boýunça pikir alyşdylar diýlip, habarda bellenilýär.
