Aşgabatda BMG-niň Aziýa-Ýuwaş ummany sebiti boýunça Ykdysady we durmuş komissiýasynyň (ESCAP) BMG-niň Aral deňziniň howdanynyň ýurtlary üçin Ýörite maksatnamasynyň döredilmegini ara alyp maslahatlaşmak boýunça sebitleýin maslahaty geçirildi. Bu barada Türkmenistanyň DIM-iniň metbugat gullugy habar berdi.

Çärä Merkezi Aziýa ýurtlarynyň ministrlikleriniň we pudaklaýyn dolandyryş edaralarynyň, Araly halas etmegiň Halkara gaznasynyň, BMG-niň Merkezi Aziýa üçin öňüni alyş diplomatiýasy boýunça sebit merkeziniň, BMG-niň edaralarynyň wekilleri, şeýle hem suw çeşmeleri, howanyň üýtgemegi we tebigy betbagtçylyklaryň öňüni almak ýaly ugurlar boýunça hünärmenler gatnaşdylar.

Duşuşygyň maksady BMG-niň Aral deňziniň howdanynyň ýurtlary üçin Ýörite maksatnamasynyň esasynda Aralyň suw baýlyklaryny gorap saklamak we tebigy betbagtçylyklaryň öňüni almak boýunça sebitleýin hyzmatdaşlygy güýçlendirmek boýunça ösüşe baha bermekden we täze mümkinçilikleri kesgitlemekden ybarat boldy.

Çärä gatnaşanlar BMG-niň Aral deňziniň howdany üçin Ýörite maksatnamasyny döretmegiň şertlerini we formatlaryny ara alyp maslahatlaşdylar.

Duşuşygyň jemleri boýunça indiki ädimler ylalaşyldy, kabul edilen resminama 2025-nji ýylyň 21-25-nji aprelinde Bangkokda geçiriljek BMG-niň Aziýa-Ýuwaş ummany sebiti boýunça Ykdysady we durmuş komissiýasynyň 81-nji mejlisinde hödürleniler.

Ýeri gelende bellesek, Aral deňziniň howdanynyň ýurtlary üçin BMG-niň Ýörite maksatnamasyny döretmek baradaky teklip 2012-nji ýylda türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow tarapyndan öňe sürlüpdi. 2023-nji ýylyň maý aýynda BMG-niň Aziýa-Ýuwaş umman sebiti boýunça Ykdysady we durmuş komissiýasynyň Bangkokda (Tailand) geçirilen 79-njy sessiýasynyň netijeleri boýunça Türkmenistanyň başlangyjy esasynda bu Komissiýanyň «Birleşen Milletler Guramasynyň Aral deňziniň howdany boýunça Ýörite Maksatnamasynyň döredilmeginiň şertlerine garamak» atly Kararnamasy biragyzdan kabul edildi.