1-nji dekabrdan Russiýa Federasiýasynyň N.I.Lobaçewskiý adyndaky Nižegorod döwlet Milli gözleg uniwersiteti tarapyndan her ýyl geçirilýän daşary ýurtlaryň raýatlary üçin rus dili boýunça «Лобачевский/RU» VII halkara olimpiadasyna hasaba alnyş başlandy. Oňa Türkmenistanyň raýatlary hem gatnaşyp bilerler. Halkara olimpiadanyň ýeňijileri we baýrakly orunlaryň eýeleri Russiýada mugt magistratura okamaga mümkinçilik alarlar. Bu barada TASS habar berýär.
Halkara olimpiadanyň düzgünnamasyna laýyklykda, oňa RF-iň ÝOM-larynda bilim alýan daşary ýurtly talyplar, daşary ýurtlaryň ýokary okuw mekdepleriniň talyplary, şeýle-de daşary ýurtlaryň 14 ýaşdan kiçi bolmadyk islendik raýaty gatnaşyp biler.
Halkara olimpiada 2024-nji ýylyň 1-nji dekabryndan 2025-nji ýylyň 28-nji martyna çenli 3 tapgyrda geçirilip, oňa gatnaşmak üçin 2025-nji ýylyň 1-nji martyna çenli guramaçy ýokary okuw mekdebiniň saýtyna girip, bellenilen nusgadaky anketany doldurmaly. Şeýle-de 1-nji tapgyryň ýumuşlaryny onlaýn görnüşde ýerine ýetirmeli.
N.I.Lobaçewskiý adyndaky Nižegorod döwlet Milli gözleg uniwersitetiniň rektory Oleg Trofimowyň aýtmagyna görä, 2018-nji ýyldan bäri geçirilip gelinýän bu Halkara olimpiada geçen ýyl 94 ýurtdan 1 müň 800-e golaý adam gatnaşypdyr. Geçen ýyl oňa gatnaşan raýatlarynyň sany boýunça öňdäki onlukda Türkmenistanyň hem ady bar.
