Azerbaýjanyň «AZCHEMCO» kompaniýasy Türkmenistanda şahamçasyny açmagy meýilleşdirýär. Bu barada «Caspian Logistics Solutions» we «AZCHEMCO» kompaniýalaryny özüne birleşdirýän holdingiň ýolbaşçysy Rifat Sultan-zade Türkmenistanyň maýa goýum forumynyň çäginde eden çykyşynda mälim etdi.
Forumda «AZCHEMCO» kompaniýasynyň Türkmenistanda amala aşyrmagy göz öňünde tutýan taslamalarynyň meýilnamalaryny tanyşdyran Rifat Soltan-zade, bilelikdäki taslamalary durmuşa geçirmek üçin Türkmenistanda kompaniýanyň şahamçasyny açmagyň möhüm ähmiýete eýedigini nygtady.
— Şu ýerde çykyşymyň ikinji bölümine — Türkmenistanyň agrohimiýa pudagyna maýa goýmak bilen bagly tekliplere geçmek isleýärin. Köpümiziň bilşimiz ýaly, karbamid öndürmekde we eksport etmekde Türkmenistan sebitde öňdebaryjydyr. Şeýle hem ýurtda kaliýniň we kükürdiň uly gorlary bar. Şübhesiz, bu şertler Prezident Serdar Berdimuhamedowyň alyp barýam konstruktiw, öňdengörüjilikli we oýlanyşykly syýasaty bilen birlikde halkara kompaniýalaryň ýurduň hökümeti tarapyndan geçirilýän tenderlere gatnaşmagyna we Türkmenistana maýa goýmagyna gyzyklanma döredýär. Holdingimiziň wekili — «AZCHEMCO» kompaniýasy mineral dökünleri öndürýän türkmen öndürijileri bilen bilelikde Türkmenistanda karbamidden we kükürtden suwuk dökünleriň önümçiligini ýola goýup biler, şeýle hem ýerli döwlet we hususy pudaklaryň wekilleri bilen sinergiýa üçin kompaniýanyň şahamçasyny açyp biler. Doganlyk ýurtda täze önümçilige maýa goýmak bilen, kompaniýa karbamid, kükürt we kükürt kislotasy esasynda suwuk azot dökünini öndürmegi meýilleşdirýär — diýip, Rifat Sultan-zade öz çykyşynda belläp geçdi.
Mundan başga-da, ol öz çykyşynyň birinji böleginde Türkmenistan bilen goňşy döwletleriň arasynda bar bolan oňyn gatnaşyklary göz öňünde tutup, Owganystanyň we Pakistanyň, şeýle hem Eýranyň üsti bilen Azerbaýjanyň ulag taslamasy — Zangezur geçelgesi bilen baglanyşykly täze ugurlary göz öňünde tutmagy teklip etdi.
Rifat Sultan-zade çykyşynyň ahyrynda Türkmenistanyň Garaşsyzlygynyň 33 ýyllygy hem-de Magtymguly Pyragynyň doglan gününiň 300 ýyllygy mynasybetli «Türkmeniň» goşgusyndan bir bölek okady we «Azerbaýjan-Türkmensitan dostlugynyň halysy» atly halyny tanyşdyrdy. «Azerhalça» tarapyndan ýekeje nusgada dokalan bu halyda azerbaýjan halkynyň gönükli akyldary Nyzamy Genjewi hem-de türkmen hallkynyň dana şahyry Magtymguly Pyragy şekillendirilipdir.
