BMG tarapyndan Türkmenistanyň başlangyjy esasynda yglan edilen Halkara parahatçylyk we ynanyşmak ýylynyň başlanmagy bilen Türkmenistanyň Belgiýadaky ilçihanasy ýurduň bu başlangyjyny wagyz etmek üçin ýerli hyzmatdaşlar bilen işjeň aragatnaşyk saklaýar. Bu başlangyç türkmen tarapynyň ählumumy derejede parahatçylygy, durnuklylygy we hyzmatdaşlygy ösdürmäge ygrarlydygyny görkezýär.
Şeýle hyzmatdaşlyga mysal hökmünde ilçihana tarapyndan Belgiýanyň «Diplomatic World» institutynyň agzasy we Merkezi Aziýanyň taryhy we geografiýasy boýunça ýöriteleşen garaşsyz daşky gurşaw hünärmeni Derýa Soýsal bilen alnyp barylýan işleri görkezmek bolar.
Derýa Soýsal Türkmenistanyň ilçihanasynyň goldawy bilen dürli media platformalary, şol sanda «Eureporter» üçin 2025-nji ýylyň «Halkara parahatçylyk we ynanyşmak ýyly» diýip yglan edilmegine bagyşlanan wideoýazgy taýýarlady. Derýa Soýsal öz çykyşynda Türkmenistanyň 1991-nji ýylda döwlet Garaşsyzlygyny alaly bäri, özüniň parahatçylyk söýüjilikli başlangyçlary arkaly sebit durnuklylygyny ýokarlandyrýan bitarap döwlet hökmünde tanalýandygyny belledi. Wideoýazgynyň doly görnüşine «Bruxelles Korner» platformasynda tomaşa edip bilersiňiz.
Ýeri gelende bellesek, «Bruxelles Korner» Brýusselde ýerleşýän iki dilli onlaýn habarlar platformasydyr. 2015-nji ýylda döredilen bu platforma fransuz we türk dillerinde halkara we ýerli syýasata, medeniýete hem-de sungata degişli köp sanly temalary öz içine alýan habarlary okyjylara ýetirýär.
Ilçihana bilen hyzmatdaşlygyň netijesinde Derýa Soýsal Türkmenistanyň daşary syýasatynyň dünýäde dabaralanmagyna işjeň gatnaşmagyny dowam etdirýär. Ýakynda ol Brýusseliň Erkinlik uniwersiteti, Kojaeli uniwersiteti hem-de Ýewropa Bileleşigi tarapyndan bilelikde guralan onlaýn konferensiýada «Gaza baý Türkmenistana Ýewropanyň gyzyklanmasynyň artmagy: hyzmatdaşlyk we Ýewropa bilen Türkmenistanyň arasyndaky gatnaşyklary ösdürmegiň geljegi» atly temada çykyş etdi.
