Türkmen bedewiniň milli baýramy mynasybetli ýurdumyzda ahalteke atşynaslygynyň taryhyny we sungatyny açyp görkezýän çäreler, kitap we şekillendiriş sungaty sergileri geçirilýär.
Türkmenistanyň Döwlet medeniýet merkeziniň Döwlet kitaphanasynyň daşary ýurt dillerindäki edebiýat bölüminde türkmen halkynyň Milli Lideri, Halk Maslahatynyň Başlygy Gurbanguly Berdimuhamedowyň türkmen halkynyň baýlygy we buýsanjy bolan ahalteke bedewlerine bagyşlanan kitaplarynyň sergisi açyldy. Bu barada «Türkmenistan: Altyn asyr» neşiri habar berdi.
Jemgyýetçilik guramalary merkezinde Türkmenistanyň Döwlet medeniýet merkeziniň Döwlet kitaphanasy bilen bilelikde guralan kitap önümleriniň sergisi we aýdym-sazly duşuşyk geçirildi. Oňa gatnaşanlar «Atda wepa-da bar, sapa-da» kitabyndan gyzykly maglumatlar barada tanyşdylar. Duşuşykda aýdym-saz çykyşlary görkezildi. Görogly etrabynyň Bedirkent geňeşliginde «Bedewim ak ganatym» baýramçylyk çäresi geçirildi. Oňa medeniýet işgärleri, bagşylar, türgenler we ýaş suratkeşler gatnaşdylar. Açyk howada çotgany we reňkleri ýerlikli ulanmagyň ussatlary ajaýyp tebigatyň goýnunda ahal-teke bedewlerini şekillendirdiler.
Bu wakalaryň ählisi aprel aýynyň soňky ýekşenbesinde Türkmen bedewiniň milli baýramynyň öňüsyrasynda geçirilýär. Bu ýyl bu sene 28-nji aprele gabat gelýär.
Baýramçylyk mynasybetli Arkadag şäherinde ilkinji gezek ahalteke bedewleriniň gözelliginiň halkara bäsleşigi geçiriler. Bu ýerde öz işlerinde behişdi bedewleriň şöhratyny wasp edýän suratkeşleriň, heýkeltaraşlaryň, halyçylaryň, zergärleriň, suratçylaryň, neşirýat işgärleriniň, bezegçileriň we operatorlaryň arasynda geçirilýän bäsleşikleriň jemi jemlener.
