Türkmenistanyň Koreýa Respublikasyndaky we Singapur Respublikasyndaky ilçisi B.Durdyýew gulluk saparynyň dowamynda Singapur Respublikasynyň Daşary işler ministrliginde ýurduň premýer-ministriniň Kanselýariýasynyň ministri Mohamad Maliki bin Osman bilen duşuşyk geçirdi. Bu barada Türkmenistanyň DIM-niň resmi saýtynda habar berildi.
Habarda bellenilişi ýaly, duşuşygyň barşynda daşary syýasy edaralarynyň öňünde goýlan ikitaraplaýyn gatnaşyklaryň we köpugurly özara bähbitli hyzmatdaşlygyň ösdürilmegine hem-de berkidilmegine gönükdirilen maksatlary we wezipeleri amala aşyrmak bilen bagly meselelere seredildi.
Türkmen diplomaty ministri şu ýylyň dowamynda Türkmenistanda we daşary ýurtlarda 2024-nji ýylyň «Pähim-paýhas ummany Magtymguly Pyragy» ýyly diýlip atlandyrylmagy mynasybetli meýilleşdirilýän möçberli çäreler, şeýle hem «akylly» Arkadag şäheriniň gurluşygynyň ikinji tapgyrynyň durmuşa geçirilişi barada tanyşdyrdy.
Taraplar söwda we ykdysady hyzmatdaşlygyň yzygiderli giňeldilmeginiň, pugtalandyrylmagynyň möhümdigini bellediler hem-de bu ugurda ägirt uly mümkinçilikleriň bardygyny aýtdylar.
Ýangyç-energetika toplumy, ulag we logistika, himiýa pudagy, senagat, oba hojalygy, ekologiýa we daşky gurşawy goramak meseleleri ileri tutulýan ugurlar hökmünde kesgitlenildi.
Mohamad Maliki bin Osman türkmen tarapyna Singapur Respublikasynyň kandidaturasyna halkara guramalaryň çäklerinde yzygiderli goldawy üçin hoşallygyny bildirdi, Türkmenistan bilen özara gatnaşyklarynyň we hyzmatdaşlygynyň pugtalandyrylmagy ugrunda goşandyny goşmaga taýýardyklaryny mälim etdi.
