Dokma senagaty we gurluşyk serişdeleriniň önümçiligi bilen meşgullanýan türkmen telekeçileri «Astana» diplomatik kluby tarapyndan we Gazagystan Respublikasynyň Türkmenistandaky Ilçihanasynyň goldaw bermeginde guralan işewürlik maksatly iş saparynyň çäklerinde Gazagystanyň maýa goýum mümkinçiliklerini öwrendiler.
Üç günüň dowamynda wekiliýetiň agzalary Astana şäheriniň maýa goýumlar we telekeçiligi ösdürmek boýunça müdirligi, «Astana Invest» hem-de «Astana ösüş merkezi» ýaly şäheriň ugurdaş guramalarynyň ýolbaşçylary bilen duşuşdylar. Duşuşyklarda bilelikdäki maýa goýum taslamalaryny durmuşa geçirmegiň, şol sanda «Astana-Tehnopolis» ýörite ykdysady zolagynyň çäginde hyzmatdaşlyk etmegiň mümkinçilikleri ara alnyp maslahatlaşyldy.
Türkmen telekeçileri degişli önümleri Gazagystanyň bazarynda mundan beýläk-de ýerlemek üçin ýörite ykdysady zolagynyň çäginde dokma önümçiligini we gurluşyk bitumyny öndürýän zawody ýerleşdirmegiň mümkinçilikleri bilen gyzyklandylar. Şeýle hem wekiliýetiň agzalary ýörite ykdysady zolagynyň Senagat parkynyň hereket edýän kärhanalaryna baryp gördüler.
Sapar iki ýurduň işewür toparlarynyň arasynda maýa goýum, gurluşyk, himiýa senagaty we innowasiýalar ulgamlarynda hyzmatdaşlygyň mundan beýläkki ugurlaryny ara alyp maslahatlaşmak bilen tamamlandy. Duşuşyga gatnaşyjylar ykdysadyýetiň dürli pudaklarynda hyzmatdaşlygy ösdürmek üçin uly mümkinçilikleriň bardygyny bellediler.
Türkmen-Gazagystan söwda-ykdysady hyzmatdaşlygyny ösdürmek üçin ýakyn wagtda Almaty, Şymkent, Aktau we Astana şäherlerine türkmen telekeçileriniň işewürlik maksatly täze iş saparlaryny guramak meýilleşdirilýär.
Işewürlik maksatly iş saparyna gatnaşmaga gyzyklanma bildirýän telekeçiler guramaçylaryň Aşgabatdaky wekiline şu telefon belgileri arkaly ýüz tutup bilerler: +993 62 60-68-85.
