Russiýanyň Orýol şäherinde geçirilýän ýaýdan ok atmak boýunça halkara ýaryşynda iki türgen Türkmenistana wekilçilik eder. Bäsleşik iki ugurda – nusgawy we tegekli ýaýdan ok atmak boýunça geçiriler. Bu barada Türkmenistan: Altyn asyry neşiri habar berýär.
Türkmenistanyň Ýaýdan ok atmak federasiýasynda habar berlişine görä, tejribeli tälimçi, sportuň şu görnüşi boýunça milli federasiýanyň ýolbaşçysy Wepa Sähedowyň ýolbaşçylygynda Orýolda geçirilýän ýaryşda ýurdumyza türkmen paýtagtynyň ýöriteleşdirilen 27-nji orta mekdebiň 10-njy synp okuwçysy Ezizmuhammet Sähedow we Aşgabadyň Bedenterbiýe we sport Baş müdirliginiň 5-nji sport mekdebiniň tälimçisi Ogulsuraý Kakyşowa wekilçilik ederler.
Geçen ýyl Ezizmuhammet Gazagystanda geçirilen «Gran Pri Astana» halkara ýaryşynda ýeňiş gazandy we Belarus Respublikasynda geçirilen GDA ýurtlarynyň II oýunlarynyň bürünç medalyny eýeledi, Ogulsuraý bolsa «Gran Pri Astana» halkara ýaryşynyň bürünç we «Gran Pri Bişkek-2023» ýaryşynyň kümüş medalyna mynasyp boldy.
Ýaryş 29-njy ýanwarda Orýol şäherinde tamamlanar.
