16-njy ýanwarda Türkmenistanyň Azerbaýjan Respublikasyndaky ilçihanasynyň binasynda, Türkmenistanda 2024-nji ýylyň “Pähim-paýhas ummany Magtymguly Pyragy” ýyly diýlip yglan edilmegi mynasybetli maslahat geçirildi. Onda beýik akyldar şahyryň umumadamzat ähmiýetli döredijiligi, doglan gününiň 300 ýyllygynyň halkara derejesinde dabaraly belleniljekdigi we çärelere ýurdumyzda alnyp barylýan taýýarlyk işleri barada belläp geçdiler. Bu barada Türkmenistanyň daşary syýasat edarasy habar berýär.
Bellenilişi ýaly, medeni çäreleriň ýene-de biri Türkmenistanyň Prezidenti Serdar Berdimuhamedowyň “Ýaşlar – Watanyň daýanjy” atly ilkinji kitabynyň tanyşdyrylyş dabarasydyr. Çykyş edenler kitabyň ýaş nesilleri watansöýüji, ylymly-bilimli, giň dünýägaraýyşly edip terbiýeläp ýetişdirmekde uly ähmiýete eýedigini bellediler.
Ýokarda agzalan çärelere Azerbaýjanyň Milli Ylymlar akademiýasynyň hem-de bu Akademiýanyň Nyzami Genjewi adyndaky edebiýat institutynyň alymlary, magtymgulyny öwrenijiler we türkmenistanly talyplar gatnaşdylar.
Dabaraly çäräniň dowamynda Türkmenistanyň Oguzhan adyndaky “Türkmenfilm” birleşiginiň Magtymguly Pyragy barada Azerbaýjanda surata düşürilen “Hakyň guly – Magtymguly” atly dokumental filminiň görkezilmegi bilen tamamlandy.
