Sanly ulgam arkaly 22-nji noýabrda geçirilen nobatdaky Hökümet mejlisiniň barşynda wise-premýer, daşary işler ministri R.Meredow Türkmenistanyň wekiliýetiniň Birleşen Arap Emirliklerine amala aşyran saparynyň netijeleri barada hem döwlet Baştutanyna hasabat berdi. Bu barada TDH ýazýar.

Hasabatda bellenilişi ýaly, häzirki döwürde Birleşen Arap Emirlikleri bilen döwletara syýasy-diplomatik gatnaşyklar ýokary derejede alnyp barylýar. Türkmenistanyň Prezidentiniň 2022-nji ýylyň noýabrynda, 2023-nji ýylyň dekabrynda bu dostlukly ýurda amala aşyran resmi hem-de iş saparlary munuň aýdyň güwäsidir. Şunuň bilen birlikde, türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowyň 2023-nji ýylyň fewralynda dostlukly ýurda resmi sapary, şu ýylyň ýanwarynda bolsa iş saparyny amala aşyrandygy aýdyldy. Söwda-ykdysady, ýangyç-energetika, gaýtadan dikeldilýän energiýa çeşmeleri, ulag-logistika ikitaraplaýyn hyzmatdaşlygyň ileri tutulýan ugurlarydyr. Mundan başga-da, medeniýet, ylym-bilim, sport ulgamlarynda gatnaşyklary ösdürmäge aýratyn ähmiýet berilýär.

Wise-premýeriň belleýşi ýaly, netijeli hyzmatdaşlygy has-da ösdürmek maksady bilen, Türkmenistanyň Prezidentiniň tabşyrygy boýunça Birleşen Arap Emirliklerine amala aşyrylan iş saparynyň barşynda duşuşyklaryň birnäçesi, hususan-da, Birleşen Arap Emirlikleriniň wise-prezidenti, Premýer-ministriniň orunbasary, Prezidentiň iş dolandyryş ministri Şeýh Mansur bin Zaýed Al Nahaýýan, BAE-niň Premýer-ministriniň orunbasary, daşary işler ministri Şeýh Abdulla bin Zaýed Al Nahaýýan bilen duşuşyklar geçirildi. Saparyň barşynda başga-da birnäçe duşuşyklar boldy.

Prezident Serdar Berdimuhamedow hasabaty diňläp, Birleşen Arap Emirlikleri bilen ikitaraplaýyn hyzmatdaşlygyň Türkmenistanyň daşary syýasatynyň ileri tutulýan ugurlarynyň hatarynda durýandygyny aýtdy. Bellenilişi ýaly, türkmen döwleti ähli ugurlar boýunça dost-doganlyk gatnaşyklaryny ösdürmäge çalyşýar.

Türkmenistanyň Prezidenti wise-premýer, daşary işler ministri R.Meredowa BAE bilen hyzmatdaşlygy yzygiderli berkitmäge aýratyn üns bermegi tabşyrdy.