Ozal habar berşimiz ýaly, Prezident Serdar Berdimuhamedow sanly ulgam arkaly nobatdaky Hökümet mejlisini geçirdi.
"Watan" habarlar gepleşiginde habar berlişi ýaly, mejlisiň barşynda wise-premýer M.Mämmedowa dekabr aýynda geçiriljek esasy çäreleriň we medeni-durmuş maksatly binalaryň açylyp ulanmaga berilmeginiň tertibi barada hasabat berdi.
Bellenilişi ýaly, indiki aýda birnäçe medeni çäreleri guramak, şeýle hem "Merdana nesil --- 2024" we «Ýylyň parlak ýyldyzy» atly bäsleşikleriň jemleýji tapgyrlaryny geçirmek göz öňünde tutulýar.
Halkara Bitaraplyk güni mynasybetli, ýurduň raýatlaryna Türkmenistanyň "Magtymguly Pyragynyň 300 ýyllygyna" atly ýubileý medalynyň gowşurylyş dabaralaryny, Bitaraplyk binasyna gül goýmak dabarasyny, Aşgabatdaky Mejlisler merkezinde medeniýet we sungat ussatlarynyň baýramçylyk konsertini, welaýatlarda hem-de Arkadag şäherinde aýdym-sazly baýramçylyk çärelerini geçirmek meýilleşdirilýär.
Birnäçe çäreler Nebitgaz senagaty we geologiýa işgärleriniň gününe gabatlanylar.
Esasy medeni çäreleriň hatarynda 15-nji dekabrda Täze ýyl baş arçasynyň yşyklarynyň ýakylyş dabarasy, "Ylham" seýilgähinde, Döwlet sirkiniň, "Älem" medeni-dynç alyş merkeziniň, Arkadag şäherindäki "Arkadag Binasynyň" öňündäki meýdançalarda, ýurduň welaýatlaryndaky "Türkmeniň ak öýi" binalarynyň öňündäki meýdançalarda guraljak medeniýet we sungat ussatlarynyň baýramçylyk konserti bar.
Şeýle hem Aşgabat şäheri bilen welaýatlaryň we Arkadag şäheriniň arasynda Täze ýyl teleköprüsini guramak, baýramçylyk feýerwerki göz öňünde tutulýar.
Dekabr aýynda ýurduň sebitlerinde birnäçe täze desgalaryň, şol sanda ýaşaýyş jaýlarynyň açylyp ulanmaga beriljekdigi barada hem aýdyldy.
Prezident Serdar Berdimuhamedow hasabaty diňläp, ýurtda bellenilýän baýramlar we şanly seneler bilen baglylykda dekabr aýynda geçiriljek çärelere gowy taýýarlyk görmegiň, ulanmaga beriljek desgalaryň we binalaryň açylyş dabaralaryny ýokary derejede geçirmegiň, şeýle hem Halkara Bitaraplyk güni, Nebitgaz senagaty we geologiýa işgärleriniň güni mynasybetli geçiriljek çärelere gowy taýýarlyk görmegiň möhümdigini belledi we bu babatda wise-premýere birnäçe tabşyryklary berdi.
