Türkmenistanyň Mejlisiniň başlygy Dünýägözel Gulmanowa we daşary işler ministriniň orunbasary Mähri Bäşimowa Merkezi Aziýanyň zenan liderleriniň öňdäki 40-lygyna girdi. Bu barada HHM habar berdi.
Degişli sanaw Özbegistanyň «Ýuksaliş» hereketi hem-de Durmuş we ykdysady başlangyçlar instituty tarapyndan bilermenleriň goldawy bilen taýýarlanyldy.
Reýting düzülende dalaşgärleriň täsiri, olaryň jemgyýetçilik-syýasy we ykdysady ugurlardaky başlangyçlary hasaba alyndy. Jemleýji saýlaw sebit ýurtlaryndan 300-den gowrak hünärmen tarapyndan geçirildi.
«34 ýaşly Dünýagözel Gulmanowa Türkmenistanyň taryhynda parlamentiň iň ýaş spikeridir. Hünärmenler onuň bu wezipä saýlanmagynyň ýurduň syýasy durmuşynda möhüm üýtgeşmeleriň alamatydygyny bellediler» diýip, HHM ýazýar.
Mähri Bäşimowa bolsa öz gezeginde Türkmenistanyň daşary işler ministriniň orunbasary hökmünde «ýaşyl ykdysadyýeti» ösdürmek we ekologiýa taýdan arassa tehnologiýalary ulanmak bilen baglanyşykly taslamalary öňe sürmäge gatnaşýar. Şeýle-de BMG-niň ýokary derejeli ýygnaklarynda işjeň çykyş edýär.
