Türkmenistanda
1. Aşgabatda türkmen alabaýynyň baýramyna bagyşlanan Halkara «Türkmen alabaý itleri» assosiasiýasynyň III maslahaty geçirildi. Daşary ýurtly it ýetişdirýän hünärmenler hem, wideokonferensiýa arkaly foruma goşuldylar. Sanly aragatnaşyk arkaly baglanyşan Halkara Assosiasiýanyň agzalary tohumyň ýagdaýy barada maglumat ýygnamagyň we alyş-çalyş etmegiň, onuň taýpalaýyn köpelmeginiň meselelerini ara alyp maslahatlaşmagyň, sanyny gorap saklamagyň we köpeltmegiň möhümdigini bellediler.
2. Prezident Serdar Berdimuhamedow, Türkmen alabaýynyň baýramy mynasybetli, Türkmenistanyň «Türkmenistanyň at gazanan itşynasy» diýen hormatly adyny dakmak hakyndaky Permana gol çekdi. Abraýly atlara mynasyp bolan itşynaslar bu sylaga degişli ugurda bitiren netijeli hyzmatlary üçin eýe boldular.
3. Türkmenistanyň Magtymguly adyndaky milli sazly drama teatrynda Nury Halmämmedowyň doglan gününiň 85 ýyllygy mynasybetli festiwalyň açylyş dabarasy boldy. Festiwal iki günläp dowam edýär. Onuň çäklerinde Aşgabatda, Arkadag şäherinde we ýurduň welaýatlarynda dürli medeni çäreler guralar.
4. 25-26-njy oktýabrda Türkmenistanyň Prezidenti Serdar Berdimuhamedow Türkiýe Respublikasyna resmi sapryny amala aşyrdy. Onuň çäklerinde Türkiýäniň Baştutany Rejep Taýyp Ärdogan bilen ýokary derejeli gepleşikler, şeýle hem Türkmen-türk işewürler maslahaty geçirildi. Saparyň dowamynda ykdysady gatnaşyklara aýratyn ähmiýet berildi. Bilelikdäki maýa goýum mehanizmlerini döretmek we ulag-logistika infrastrukturasyny ösdürmek baradaky başlangyçlar ara alnyp maslahatlaşyldy. Taraplar söwda dolanyşygyny ýokarlandyrmak isleýändikdigini mälim etdiler. Saparyň dowamynda Türkmenistanyň Prezidenti we Türkiýäniň döwlet Baştutany özara simwoliki sowgatlar alyşdylar. Prezident Serdar Berdimuhamedow türk kärdeşine Gardaş atly türkmen Alabaý güjügini sowgat berdi. Rejep Taýyp Ärdogan hem öz gezeginde Türkmenistanyň Prezidentine iki sany türk Kangal tohumly itini sowgat berdi. Prezident Serdar Berdimuhamedow Rejep Taýyp Ärdogany amatly wagt tapyp, Türkmenistana resmi sapar bilen gelmäge çagyrdy. Saparyň wagty diplomatik ugrular arkaly ylalaşylar.
5. «Türkmenistanyň nebiti we gazy — 2023» atly halkara maslahata we sergä rekord derejede gatnaşyjy geldi. 50-den gowrak ýurtdan 700-den gowrak wekiliň gatnaşmagy häzire çenli bu forum babatda iň ýokary derejedir. Bu barada «Türkmen forum» hojalyk jemgyýetiniň direktory Nazar Atajanow çäreden soň geçirilen metbugat maslahatynda habar berdi. 70-den gowrak kompaniýa Türkmenistanyň Söwda-senagat palatasyndaky OGT-2023 sergisinde öz diwarlyklaryny ýerleşdirdi. Üç günüň dowamynda sergä, takmynan 10 müň töweregi adam gatnaşdy.
6. Koreýa Respublikasynyň daşary işler ministri Pak Jin «Merkezi Aziýa — Koreýa Respublikasy» Hyzmatdaşlyk forumyna gatnaşmak üçin Türkmenistana geler. 1-nji noýabrda geçiriljek forum ykdysadyýetiň, durmuşyň dürli gatlaklaryndan 200-e golaý wekilini bir ýere jemlär. Forumda ekologiýa, saglygy goraýyş, ulag, maglumat tehnologiýasy hem-de bilim ýaly dürli ugurlardaky meseleler ara alnyp maslahatlaşylar.
Dünýäde
7. Belgiýa çilimkeşlige garşy çärelerini güýçlendirýär. 2025-nji ýyldan başlap, 400 inedördül metrden uly supermarketlerde çilim satmak gadagan ediler. Bu karar Belgiýa Hökümetiniň 2040-njy ýyla çenli ýurtda çilim çekmegiň derejesini 5%-e çenli azaltmak bilen bagly meýilnamasynyň bir bölegidir. Mundan başga-da, Belgiýanyň Hökümeti çilim çekmegiň gadagan ýerleriniň sanawyny giňeltdi. Indi bu ýerlere sport meýdançalary, kitaphanalar we hassahanalar degişlidir. Şeýle hem, indiden başlap, eger awtoulagda çaga bar bolsa, çilim çekmek gadagan edilýär.
8. Almaty şäheriniň ýaşaýjylary şäheriň haýwanat bagyndaky jandarlar üçin iýmit ýygnamak çäresine gatnaşýarlar. Şäheriň ilatynyň bu işe girişmegi netijesinde diňe bir Almatynyň köçeleri gaçan hozlardan arassalanman, eýsem haýwanlar hem iýmitli boldular. Ýygnalan hozlar üçin haýwanat bagy mugt petekleri, şahadatnamalar we kiçili-ululy baýraklary bilen minnetdarlyk bildirdi. Hozlary ýabany doňuzlar, sugunlar, keýikler, saýgaklar, düýeler, hatda žiraflar hem iýýärler.
Sport täzelikleri
9. Golaýda, has takygy 10-njy noýabrda Moskwada geçiriljek «Fight Nights» ýaryşynda türkmenistanly bir türgen çykyş eder. Muny promouter kompaniýasynyň prezidenti Kamil Gajiýew mälim etdi. «Gala Sport Management-iň» «Turkmenportal» üçin iberen hatynda: «Ýakyn wagtda dünýäniň öňdebaryjy ligalarynyň birinde Türkmenistana wekilçilik etjek türgenimiziň söweşini yglan ederis» – diýlip bellenilýär.
10. Özbegistanyň Karşi şäherinde geçirilen halkara tennis ýaryşynda ýaş türkmen türgenleri ýokary netijeleri görkezip, dört sany altyn medal gazandylar. 14 ýaşa çenli oglanlaryň arasynda geçirilen ýaryşda Imran Ahundow iň tapawutlanan netijäni görkezdi. Jübütleýin ýaryşda Imran Ahundow bilen Selim Çagylowyň jübüti hem ýeňiş münberine çykmagy başardylar. Bäsleşigiň gyzlar tapgyrynda Ilima Huseýnowa ähli garşydaşlaryny ýeňip, ýekelikde çempion boldy. Türkmen tennisçileri bu ýaryşa tälimçiler Andreý Dowmatowyň we Ýewgeniý Molçanowyň ýolbaşçylygynda gatnaşdylar.
11. Türkmen küştçüleri 15 — 25-nji oktýabr aralygynda Şarm el-Şeýh şäherinde 8, 10 we 12 ýaşa çenli çagalaryň arasynda geçirilen dünýä çempionatynda üstünlikli çykyş etdiler. Iň oňat netijäni 8 ýaşa çenli oglanlaryň arasynda geçen tapgyrda çykyş eden Maksat Öwlýagulyýew görkezdi. Ol mümkin bolan 11 utukdan 7 utuk toplap, 80 gatnaşyjynyň arasynda 19-njy ýeri eýeledi.
12. 2012 we 2013-nji ýyllarda doglan çagalaryň arasynda Türkmenistan stolüsti tennis topary Daşkentdäki Halkara stol tennisi federasiýasynyň ösüş maksatnamasynyň çäginde guralan okuw-türgenleşik ýygnanyşygyna gatnaşýar. Bu çärä Eýranyň, Gazagystanyň, Gyrgyzystanyň we Özbegistanyň wekilleri hem gatnaşýarlar. Ýygnanyşyklar sebitde stol tennisini ösdürmäge we zehinli hem-de geljegi uly türgenleri ýetişdirmäge gönükdirilendir.
