1. Türkmenistanyň Ylymlar akademiýasynyň Magtymguly adyndaky Dil, edebiýat we milli golýazmalar institutynyň alymlary awgust aýynyň dowamynda Wengriýanyň Ylymlar akademiýasynyň kitaphanasynda we maglumat merkezinde işlediler. Olar bu ýerde Magtymguly Pyragynyň ömri we döredijiligi barada ozal näbelli bolan täze taryhy maglumatlary tapdylar. Wengriýaly hünärmenler bu kitaphanada on müňden gowrak arap, pars we gadymy türk golýazmalarynyň bardygyny habar berdiler we bu golýazmalaryň kataloglaryny öwrenmäge mümkinçilik döretdiler.
2. Türkmenistanyň wekiliýeti 14-nji sentýabrda Duşenbäniň Täjigistan milli uniwersitetinde geçiriljek Merkezi Aziýa ýurtlarynyň ýokary hünär bilimi edaralarynyň rektorlarynyň Ikinji forumyna gatnaşar. Foruma Merkezi Aziýa ýurtlarynyň bilim ministrleri, şeýle hem Täjigistanyň, Gazagystanyň, Özbegistanyň, Türkmenistanyň we Gyrgyzystanyň ýokary hünär bilimi edaralarynyň rektorlary gatnaşarlar. Forumyň gün tertibi bilim-ylym pudaklarynda özara hyzmatdaşlygy giňeltmek, şeýle hem mugallym we talyp alyş-çalşygyny işjeňleşdirmek meselelerine gönükdiriler.
3. Ýapon dili boýunça bilim derejesini kesgitleýän JLPT synagy üçin ýüz tutmalaryň kabul edişligi başlanýar. Seçip almak işleri 8-nji sentýabrda Ýaponiýanyň Türkmenistandaky ilçihanasynda geçiriler. Ýaponiýanyň ýokary okuw mekdeplerine girmek üçin daşary ýurtly talyplar bu synagdan geçmelidirler. «Noreku Siken» ady bilen hem meşhur bolan JLPT şahadatnamasy Ýaponiýanyň uniwersitetleriniň köpüsine girmek üçin zerurdyr.
4. «Samsung» kompaniýasy emeli aň bilen işleýän şahsylaşdyrylan iýmit we tagam taýýarlaýyş usullary boýunça «Samsung Food» hyzmatynyň bütin dünýäde işe girizilýändigini habar berdi. Täze platforma «Samsung» kompaniýasynyň aşhana enjamlaryny we nahar taýýarlamak boýunça hyzmatlary döretmekde toplan baý tejribesine daýanyp, ulanyjylaryň şahsy islegleriniň esasynda we önümleriň möwsümine laýylykda, tagam taýýarlaýyş usullaryny hödürleýär. «Samsung Food» hyzmatynyň binýadynda eýýäm türkmen milli tagamy işlekliniň taýýarlanyş usuly peýda boldy. Platforma dünýäniň 104 ýurdunda 8 dilde elýeterlidir.
6. Fransiýanyň Mennesi şäherinde häkimiýetler öý eýeleriniň daş-töwerekde gezelenç etmek üçin çykarýan öý pişikleri hakynda alada etmek kararyna geldiler. Ýollaryň ugrunda pişigiň şekili we «Gezelenç edýän pişik» diýen ýazgy ýerleşdirilen belgiler goýuldy. Olar sürüjileri has seresap bolmaga we islendik pursatda öý haýwanlarynyň çykyp biljekdigi üçin ýola üns bermäge çagyrmak üçin döredildi. Kirpileri we atlary goramak üçin hem şuňa meňzeş belgiler oturdyldy, çünki bu haýwanlar hem köplenç awtoulaglaryň tekerleriniň aşagynda galýarlar.
7. Fransuz syýahatçysy Italiýanyň Sardiniýa adasynda ýerleşýän Porto-Konte tebigy seýilgähindäki kenardan 40 kilogramdan gowrak çagyl we ownuk daşlary ogurlady. Kanuna görä, Sardiniýanyň kenarlarynyň çäginden daşyna çäge, balykgulak we daş çykarmak gadagan, munuň üçin birnäçe müň ýewrolyk jerime salynýar. Kenarýaka ýadygärlikleriniň muşagy Nissa şäherine barýan gämä münende saklanyldy, ol goş-golamlarynda 41 kilogram çagyl we ownuk daşlary alyp barýardy. Indi ogra 3 müň ýewro çenli jerime garaşýar, daşlar bolsa alnan kenaryna gaýtaryldy.
8. Ýaponiýanyň Türkmenistandaky ilçisi Ýamamoto Hiroýuki Türkmenistanyň Karate federasiýasynyň ýolbaşçysy Ýaşuzak Mämmetnazarow bilen duşuşyk geçirdi. Duşuşygyň dowamynda ilçi federasiýanyň wekiline Ýaponiýanyň Daşary işler ministrliginiň Hormat hatyny gowşurdy. Bu sylag federasiýa Türkmenistanda karateni ösdürmekde bitiren hyzmatlary üçin gowşuryldy. Türkmenistanyň Karate federasiýasy ýurtda yzygiderli ýaryşlary gurap gelýär. Şonuň esasynda bolsa türkmen türgenleriniň arasynda bu sport görnüşiniň meşhurlygy artýar.
9. Paýtagtyň we ýurduň welaýatlarynyň atçylyk sport toplumlarynda at çapyşygynyň güýzki möwsümi başlandy, bu çäre atçylyk toplumlarynyň münberlerine atçylyk sportynyň köp sanly muşdaklaryny ýygnady. Aşgabadyň atçylyk sport toplumynda 7 çapyşyk geçirildi we oňa 50-den gowrak at gatnaşdy. 3, 4 ýaşar we has uly ýaşly ahalteke atlary çapuw ýodasyna çykdylar. 1400, 1600, 2000 we 2200 metr aralyga geçirilen çapyşylarda ýeňijiler kesgitlenildi.
10. Futbol boýunça Russiýanyň milli ýygyndysy sentýabr aýynda iki ýoldaşlyk duşuşygyny geçirer. 7-nji sentýabrda Müsüriň Sues şäherinde ruslar ýurduň olimpiýa ýygyndysy bilen duşuşarlar. 11-nji sentýabrda Kataryň paýtagty Dohada geçiriljek duşuşykda Waleriý Karpiniň toparynyň garşydaşy öý eýeleriniň ýygyndysy bolar. Iki oýun hem Birinji teleýaýlymda (Perwyý kanal) göni ýaýlymda görkeziler.
