Orta asyrlarda heniz adam aýagy sekmedik ýerler aždarhalardyr beýleki mifiki elhenç haýwanlaryň ýaşaýan mekany hasaplanypdyr diýip, «MIR 24» ýazýar.
Mysal üçin, «Hant-Lenoksyň globusy» diýilýän 1508-nji ýyla degişli kartada Aziýanyň günorta kenarýakalary «HIC SVNT DRACONES» diýlip belgilenipdir, bu latynçadan terjime edilende, «Bu ýerde aždarhalar ýaşaýar» diýmekdir.
Alymlar golaýda ylmy-barlaglaryň dowamynda aždarhalar barada agzalýan ýene bir kartany tapdylar, ol 1504-nji ýyla degişli globus bolup, onda-da şeýle ýazgy bar eken.
Alymlar bu globuslaryň dürli döwürlerde döredilendigine garamazdan, aždarhalaryň ýaşaýan mekany hökmünde Aziýanyň görkezilendigini belleýärler. Olaryň pikiriçe, aždarhalaryň ýatlanylmagy we şekilleri geçmişde adamlaryň, hakykatdanam, bu elhenç jandarlaryň ýaşaýandygyna ynanandyklaryny görkezýär diýip, hasaplaýarlar.
Aždarhalar barada ýatlamalar kartalardan XVI asyryň ahyrynda ýitip başlapdyr, alymlar muny beýik geografiki açyşlaryň döwri, ylmyň ösmegi we akylly-başly pikirlenmek bilen baglaýarlar diýip, «IFLScience» neşiri ýazýar.
