Gyrgyzystanyň hokkeý boýunça milli ýygyndysynyň 2024-nji ýyldaky dünýä çempionatynda Türkmenistanyň ýygyndysy bilen bir toparçada çykyş etmegi mümkin. Çünki gyrgyz ýygyndysy şu ýylky dünýä çempionatynyň üçünji dwizionynyň «B» toparçasynda ýeňiji bolup, indiki ýyl «A» toparça goşulmaga hukuk gazandy.
«B» toparçanyň duşuşyklary 27-nji fewral ― 5-nji mart aralygynda Bosnýa we Gersegowinanyň Saraýewo şäherinde geçirildi. Ýaryşa alty ýygyndy ― Bosnýa we Gersegowina, Gonkong, Eýran, Malaýziýa, Singapur hem-de Gyrgyzystan gatnaşdy. Olar öz aralarynda bir gezekden duşuşdylar.
Geçiren duşuşyklarynyň bäşisinde-de ýeňiş gazanan gyrgyz ýygyndysy 15 utuk bilen birinji orny eýeledi. Toparçada ýer eýeleri ikinji, Gonkongyň ýygyndysy üçünji orny eýeledi.
Ýaryşda gyrgyz hokkeýçileri garşydaş derwezelere jemi 76 şaýba geçirdiler.
Şeýlelikde, Gyrgyzystanyň hokkeý ýygyndysy 2024-nji ýylda dünýä çempionatynyň üçünji dwizionynyň «A» toparçasynda ýaryşar. Häzir bu toparçada Türkmenistanyň hokkeý ýygyndysy hem bar.
Gyrgyzystan üçünji dwiziona geçen ýyl göterilipdi. Ýygyndy dördünji dwizionyň Bişkek şäherinde geçirilen ýaryşynda çempion bolupdy.
Üçünji dwizionyň «A» toparçasyndaky duşuşyklaryň 17 ― 23-nji aprel aralygynda Günorta Afrika Respublikasynda geçiriljekdigini ýatladýarys.
