Girmek
Türkmenistanyň Futbol federasiýasynyň (TFF) Eminler bölümi Ahal welaýatynyň Bedenterbiýe we sport boýunça baş müdirligi bilen bilelikde Tejen şäherinde ýaş eminleri saýlap almak boýunça okuw-maslahat beriş seminaryny geçirdi.
TFF-niň habar berşi ýaly, okuw-seminary Ahal welaýatynyň sport mekdepleriniň ýaş tälimçilerini we eminlige gyzyklanma bildirýän ýokary synp okuwçylaryny çekmäge gönükdirildi. 40-a golaý ýaş hünärmen eminligiň inçe syrlary barada giňişleýin düşünje aldylar we futbol oýnunyň düzgünlerinde bolýan birnäçe ýagdaýlary seljermäge gatnaşdylar.
Sapaklary TFF-niň Eminler bölüminiň başlygy, CAFA-nyň gözükdiriji hünärmeni Çarymyrat Gurbanow we halkara derejeli emin Ahmet Beknazarow geçirdiler.
Şunuň ýaly seminarlary şu ýylyň ahyryna çenli paýtagtda hem-de ýurdumyzyň beýleki welaýatlarynda geçirmek meýilleşdirilýär. Okuwlaryň netijesi boýunça ýaş eminler 2025-nji ýylda TFF-niň howandarlygyndaky dürli ýaryşlara eminlik etmäge hukuk alarlar.Olaryň hataryndan has kämilleşen eminler Ýokary liganyň we Türkmenistanyň Kubogy ugrundaky oýunlara eminlik etmäge çekilip bilner.