Soňky habarlar

Arhiw

DÇ-2022: Horwatiýa penaltiler seriýasynda Ýaponiýany utup, çärýek finala çykdy

23:1205.12.2022
0
37304

DÇ-2022-niň pleý-off tapgyrynda ilkinji gezek ýeňijini penaltiler seriýasy kesgitledi. Biraz ozal tamamlanan 1/8 final tapgyrynyň oýnunda Horwatiýa Ýaponiýany penaltiler seriýasynda 3:1 hasabynda ýeňlişe sezewar etdi. Duşuşygyň esasy wagty 1:1 hasabynda deňlikde tamamlandy. Ýaponlar 43-nji minutda Maedanyň goly bilen öňe saýlandylar. Horwatlar bu gola 55-nji minutda Perişiçiň kelle bilen geçiren owadan urgusy bilen jogap gaýtardylar. Duşuşygyň goşmaça wagtynda iki tarap hem tapawutlanyp bilmedi.

Ýeňijini kesgitlän futbol lotoreýasynda horwatlaryň derwezeçisi Liwakowiç üç urgyny gaýtarmagy başardy. Ol Minaminonyň, Mitomanyň we Ýosidanyň 11 metrlik nokatdan depen toplarynyň derwezä girmegine böwet boldy. Horwatlardan diňe Liwaýa penaltiden dürs peýdalanyp bilmedi. Netijede her tarap 4 urgy geçirenden soňra Horwatiýa 3:1 hasabynda ýeňiş gazandy.

Ýeri gelende bellesek, Horwatiýa 2018-nji ýylda Russiýada geçirilen dünýä çempionatynda hem 1/8 finalda Daniýany penaltiler seriýasy boýunça ýeňipdi. Gyzykly tarapy, şol duşuşykda-da horwatlaryň derwezeçisi Subaşiç üç penaltini gaýtarmagyň hötdesinden gelipdi.

Horwatiýa 1/4 final tapgyrynda Braziliýa — Koreýa oýnunyň ýeňijisine garşy meýdança çykar. Duşuşyk 9-njy dekabrda geçiriler.

Teswirler
Teswir ýazmak üçin içeri giriň ýa-da registrasiýa boluň