Türkmenistanyň 20 ýaşa çenli ýaşlardan düzülen zenanlar ýygyndysy (U20) Aziýa Kubogy – 2024-iň saýlama tapgyrynda “H” toparçada bäsleşer. Şu gün geçirilen bije çekişligiň netijesinde ýurdumyzyň ýaşlar zenanlar ýygyndysynyň garşydaşlary Eýranyň hem-de Bangladeşiň ýygyndylary bolar.
Saýlama tapgyryň duşuşyklary 2023-nji ýylyň 4-12-nji martynda geçiriler. Bu toparçanyň duşuşyklarynyň merkezleşdirilen görnüşinde Bangladeşde geçirilmegine garaşylýar.
Saýlama tapgyrynyň «A», «B», «C», «D», «E», «F» hem-de «G» toparçalarynyň duşuşyklary merkezleşdirilen görnüşinde Laosda, Palestinada, Gyrgyz Respublikasynda, Iordaniýada, Taýlandda, Wýetnamda hem-de Kambojada geçiriler. Birinji aýlawyň jemi boýunça öz toparçalaryny birinji hatarda tamamlan ýygyndy toparlaryň 8-si ikinji aýlawda güýç synanyşmaga mümkinçilik alarlar. Ikinji aýlawyň duşuşyklary 2023-nji ýylyň 3-11-nji iýuny aralygynda geçirilip, netijeli çykyş eden ýygyndylaryň dördüsi yklym ýaryşynyň final tapgyryna çykarlar.
Ýaponiýanyň, Koreýa Halk Demokratik Respublikasynyň hem-de Koreýa Respublikasynyň ýygyndy toparlary Yklym ýaryşynyň final böleginde saýlama tapgyryna gatnaşmazdan çykyş ederler. Şeýle-de, bu sanawa Aziýa Kubogyny guraýjy Özbegistanyň ýygyndy topary hem goşuldy.
20 ýaşa çenli gyzlardan düzülen ýygyndy toparlaryň gatnaşmagyndaky Aziýa Kubogynyň final tapgyry 2024-nji ýylda Özbegistanda geçirmeklik meýilleşdirilýär.
