Gazagystanyň we Türkmenistanyň Hökümetleri iki döwletiň arasynda yzygiderli howa gatnawlaryny gysga wagtda dikeltmek üçin iş alyp bararlar. Bu barada Gazagystanyň Prezidenti Kassym-Žomart Tokaýew, türkmen kärdeşi Serdar Berdimuhamedow bilen geçirilen gepleşiklerden soň metbugat wekilleri üçin geçirilen brifingde aýtdy.
Türkmenistan bilen Gazagystanyň arasynda yzygiderli uçuşlar koronawirus pandemiýasy sebäpli 2020-nji ýylyň mart aýynda kesildi. Pandemiýadan öň «Türkmenistan» awiakompaniýasy Almaty şäherine her hepdede yzygiderli gatnawlary amala aşyrýardy.
Türkmenistanyň Prezidenti Serdar Berdimuhamedowyň Gazagystana eden ilkinji döwlet sapary wagtynda ýurtlaryň ýolbaşçylarynyň arasynda ikiçäk we giňeldilen görnüşde gepleşikleriň geçirendigini ýatladýarys. Şeýle hem döwletleriň arasynda 14 resminama gol çekildi.
