Türkmenistanda «E-Bilim» okuw platformasy döredildi. Birnäçe ugur üçin niýetlenen, wideo okuw sapaklary ýerleşdirilen bu platforma mugallymlardyr talyplar, mekdep okuwçylary üçin ylym-bilim babatda tejribe alyşmakda özboluşly gollanmadyr. Bu barada «Rysgal» gazetinde habar berilýär.
«E-Bilim» platformasynyň esasy maksady onlaýn okuw sapaklaryny ýola goýmakdan we bu okuw sapaklarynyň elýeter bolmagyny gazanmakdan ybaratdyr. Platformada ýerleşdirilen wideo okuw sapaklary türkmenistanlylar üçin tölegsiz bolup, orta we ýokary okuw mekdeplerinde öwrenilýän dersler boýunça hem birnäçe maglumatlary özünde jemleýär.
Häzirki wagtda bu platformanyň 3 müňe golaý agzasy bar. Instruktorlar, ýagny öwrediji mugallymlar belli bir ugur boýunça taýýarlanan wideo sapaklaryny platforma ýerleşdirýär. Wideo sapaklar barlagdan geçirilenden soňra, diňleýjä — öwrenijilere elýeterli edilýär.
Ýeri gelende belläp, «App store» we «Play market» internet dükanlaryndan «E-Bilim» mobil goşundysyny ýükläp almak mümkinçiligi hem döredilendir. Bu mobil goşundysynyň kömegi bilen diňleýjiler internet arkaly özüne belläp alan wideo sapaklaryny islendik ýerde, islän wagty, interneti ulanmazdan, görüp bilýärler. Platformany has-da kämilleşdirmek, onuň ýerine ýetirýän işleriniň gerimini giňeltmek barada yzygiderli çäreler geçirilýär.
Häzirki wagtda onuň düzüminde «synag» bölümini ornaşdyrmak boýunça degişli işler alnyp barylýar. Mugallymlar öwrenijileriň özleşdiren wideo sapaklary boýunça bilim derejelerini barlamakda, ýokarlandyrmakda «synag» bölümini peýdalanyp biler.
Platformanyň «terjime» bölümi dil öwrenýän diňleýjilere niýetlenip, onda öwreniji islendik bir dil boýunça bilmeýän sözüniň terjimesini öwrenip biler. Mundan başga-da, platformada «zoom» bölümi bolup, ol belli bir mugallymlaryň arasynda wideo konferensiýalary, özara açyk sapaklary geçirmek maksady bilen ýola goýuldy. Bu bölüm diňe tassyklanan öwrediji mugallymlara elýeterli bolup, geljekde onuň gerimini has-da giňeltmek meýilleşdirilýär.