Gyrgyzystanda düýn — 11-nji aprelde Konstitusiýa üýtgetmeler we goşmaçalar girizmek boýunça sala salşyk geçirildi. Saýlawda saýlawçylaryň 79,3 göterimi Prezidentiň ygtyýarlyklaryny giňeldýän Konstitusiýanyň täze görnüşini goldady,
Gyrgyzystanyň Merkezi saýlaw toparynyň habaryna görä, saýlawçylaryň 13,6 göterimi Konstitusiýa üýtgetmeler we goşmaçalar girizilmegine garşy ses berdi.
Sala salşyga gyrgyz ilatynyň 36,9 göterimi gatnaşdy. Kanun boýunça, sala salşyga ilatyň 30 göterimi gatnaşsa we olaryň ýarysyndan — 50 göteriminden gowragy täze Konstitusiýany goldasa, sala salşyk dogry geçdi hasaplanýar.
Sala salşygyň jemleýji netijeleri ýakyn 10-15 günüň içinde yglan ediler.
Gyrgyzystanyň täze Konstitusiýasyna laýyklykda, Gyrgyzystanyň Prezidenti döwletiň we ýerine ýetiriji häkimiýetiň baştutanydyr.
Gyrgyzystanyň Konstitusiýasy 1993-nji ýylda kabul edildi we şondan bäri 10 gezek üýtgetmeler we goşmaçalar girizildi. Gyrgyzystanda Premýer-ministriň we mejlisiň ygtyýarlyklaryny güýçlendirmeklik maksady bilen, Konstitusiýa iň soňky gezek 2016-njy ýylda üýtgetmeler we goşmaçalar girizilipdi. 2021-nji ýylyň 10-njy ýanwarynda geçirilen sala salşygyň jemleýji netijelerine görä, Gyrgyzystan döwlet dolandyrylyşynyň prezident respublikasy görnüşine geçdi. Hut şu nukdaýnazardan-da, Gyrgyzystanda düýn — 11-nji aprelde ýurtda Prezidentiň ygtyýarlyklaryny giňeltmeklik maksady bilen, Gyrgystanyň Konstitusiýasyna üýtgetmeler we goşmaçalar girizildi.
