Soňky habarlar

Arhiw

Türkmenistanyň Prezidenti «Lukoýl» açyk görnüşli paýdarlar jemgyýetiniň ýolbaşçysyny kabul etdi

23:5605.02.2020
0
13742

Türkmenistanyň Prezidenti Gurbanguly Berdimuhamedow Russiýa Federasiýasynyň «Lukoýl» açyk görnüşli paýdarlar jemgyýetiniň ýolbaşçysy Wagit Alekperowy kabul etdi.

Duşuşygyň dowamynda döwlet Baştutany hem-de «Lukoýl» kompaniýasynyň ýolbaşçysy bar bolan mümkinçilikleri we olary amala aşyrmagyň meýilnamalaryny nazara almak bilen, hyzmatdaşlygyň geljegi barada pikir alyşdylar.

Ýurduň energetika strategiýasynyň energiýa serişdelerini dünýä bazarlaryna ibermek, nebitgaz çykarýan hem-de gaýtadan işleýän önümçilikleriň kuwwatlyklaryny artdyrmak, gaz we nebithimiýa senagatyny ösdürmek hem-de ýokary tehnologiýaly önümleri öndürmek ýaly esasy ugurlaryna aýratyn üns berildi.

Türkmenistanda amala aşyrylýan, milli ykdysadyýetimizi senagatlaşdyrmagy we sanlaşdyrmagy ugur edinýän giň gerimli maksatnamalar, okgunly ylmy-tehnologik ösüş hem-de sebit we halkara ähmiýetine eýe bolan iri düzümleýin taslamalar üstünlikli hyzmatdaşlyk etmek hem-de oňa sazlaşykly häsiýet çaýmak üçin uly mümkinçilikleri açýar.

Söhbetdeşligiň barşynda işewür hormatly Prezidenti Hazar deňzindäki uglewodorod ýataklaryny özleşdirmek babatda «Lukoýl» kompaniýasynyň alyp barýan işleri bilen tanyşdyrdy. Işewüriň belleýşi ýaly, Türkmenistanda maýa goýum ýagdaýy hem-de bu ýerde nebit we gaz ýataklaryny işläp taýýarlamaga, düzümiň gurluşygyna netijeli maýa goýmaga mümkinçilik berýän hukuk binýady döredildi. Şonuň üçin onuň ýolbaşçylyk edýän kompaniýasy şol ugurlarda taslamalaryň durmuşa geçirilmegine gyzyklanma bildirýär.

Türkmenistanyň Prezidenti russiýaly hyzmatdaşlaryň başlangyçlaryny goldap, taraplarda bar bolan teklipleriň «Türkmennebit» we «Türkmengaz» döwlet konsernleri bilen bilelikde öwrenilmegi hem-de seretmäge hödürlenilmegi barada tabşyryk berdi.

Teswirler
Teswir ýazmak üçin içeri giriň ýa-da registrasiýa boluň