Türkmenistanyň Magtymguly adyndaky Ýaşlar guramasynyň welaýat geňeşiniň hem-de welaýat baş bilim müdirliginiň bilelikde guramaklarynda Türkmenabat şäherindäki 3-nji orta mekdebiň binýadynda welaýatyň orta mekdepleriniň ýokary synp okuwçylarynyň arasynda taslama bäsleşiginiň şäher tapgyry geçirildi ― diýip, «Türkmen gündogary» gazeti habar berýär.
Zehinli ýaşlar dört şert, ýagny, taslama işiniň ylmylygy, täzeçilligi, durmuşda ulanylyşy we okuwçynyň öz işini gorap bilşi boýunça bäsleşdiler. Netijede bäsleşigiň şertlerini ussatlyk bilen ýerine ýetiren 38-nji orta mekdebiň 9-njy synp okuwçysy Azim Gapurjanow birinji, takyk we tebigy ugurlara ýöriteleşdirilen 28-nji orta mekdebiň 11-nji synp okuwçysy Serdar Arametow ikinji, 3-nji orta mekdebiň 10njy synp okuwçysy Aýnabat Koçyýewa bolsa üçünji orunlara mynasyp boldular we olar bäsleşigiň welaýat tapgyryna gatnaşmaga hukuk gazandylar. Ýeňijilere TMÝG-niň Türkmenabat şäher geňeşi tarapyndan Hormat hatlary hem-de gymmat bahaly ýadygärlik sowgatlary gowşuryldy.