Daşoguz welaýatynyň Ruhubelent etrabynda gara mallaryň 1200-sini saklamaga niýetlenen maldarçylyk fermasy gurulýar. Ony “Ýüpek ýoly gurluşyk” hojalyk jemgyýeti gurýar, oňa şu maksatlar üçin döwlet tarapyndan uzak möhletleýin peýdalanmaga 600 gektar ýer bölünip berildi. Häzirki wagtda sygyrlaryň 384-sini saklamaga niýetlenen binanyň gurluşygy tamamlanyp barýar. Şeýle hem önümçilige gözegçilik üçin bina guruldy ― diýip, «Altyn asyr: Türkmenistan» elektron gazeti ýazýar.
100 tonna süýt we 300 tonna et öndürmäge niýetlenen maldarçylyk toplumy ýöriteleşdirilen döwrebap enjam bilen üpjün ediler. 17 ga ýerde gara mallar we göleler üçin ýataklaryň birnäçesi, sygyr sagylýan bölüm, kömekçi binalar, şol sanda silos çukurlary, suw saklanýan ýerler, tehniki desgalar bölegi bolar. Hojalygyň öz ot-iýmlik binýady bolar.
Amatly ykdysady şertler netijesinde hususy düzümler - TSTB-niň agzalary tarapyndan şu kysmy dürli kuwwatlykly gaýtadan işleýän önümçilikler Daşoguz welaýatynyň beýleki etraplarynda-da döredilýär. Mysal üçin, Ruhubelent etrabynda telekeçi B. Myradow 100 tonna süýt we 80 tonna et öndürmäge niýetlenen toplum gurýar. S. Türkmenbaşy etrabynyň “Ýalkym” daýhan birleşiginde “Dogan arzuwy” hususy kärhanasy 200 baş gara mala niýetlenen fermer hojalygyny gurýar. Telekeçi H. Sadullaýew S.A.Nyýazow adyndaky etrabyň “Nowaýy” daýhan birleşiginde şeýle taslamany durmuşa geçirýär. Şu toplumlaryň işe girizilmegi demirgazyk sebitde maldarçylyk pudagyny ösdürmek we ilaty ýokary hilli azyk önümleri bilen üpjün etmek boýunça uly möçberli işde möhüm ädim bolar.
