Adamzadyň ösüşinde möhüm hyzmaty ýerine ýetiren Beýik Ýüpek ýoly üçünji müňýyllykda gaýtadan täze we has kämil keşpde dikeldilýär. Milli Liderimiz dünýä döwletleri bilen ýola goýlan hyzmatdaşlygy barha giňeldýär, ony täze many-mazmun bilen baýlaşdyrýar. Muňa 2017-nji ýylyň 6-njy martynda ulanylmaga berlen Türkmenabat — Farap awtomobil we demir ýol köprüleri mysal bolup biler. Mälim bolşy ýaly, ýurdumyzyň ulag-üstaşyr mümkinçiliklerini giňeltmekde möhüm ähmiýeti bolan bu desgalaryň açylyş dabarasyna hormatly Prezidentimiz özüniň özbegistanly kärdeşi bilen bilelikde gatnaşypdy. Döwlet Baştutanymyz bu taryhy waka mynasybetli möhüm Karara gol çekdi. Resminama laýyklykda, Türkmenistanyň Demir ýol ulaglary ministrligine şol bir wagtda buýrujy we baş potratçy hökmünde Amyderýanyň üstünden gurlan Türkmenabat ― Farap awtomobil we demir ýol köprüleriniň ýanynda monumentiň taslamasyny düzmek we onuň ýanaşyk ýerlerini abadanlaşdyryp gurmak işlerine ygtyýar berildi. Ýurdumyzyň ykdysadyýetinde möhüm ähmiýete eýe bolan ulag-aragatnaşyk pudagynda amala aşyrylýan beýik işleriň özboluşly waspçysyna öwrüljek bu bina ýollaryň çatrygynda, umumy meýdany 1,1 gektara barabar bolan tegelek görnüşli meýdanda guruldy.
Öňňin, 7-nji aprelde — Bütindünýä saglyk gününde «Ýüpek ýoly» binasynyň açylyş dabarasy boldy. Onda gutlag sözleri bilen çykyş edenler hormatly Prezidentimiziň ýurdumyzy bedew bady bilen ösdürmäge, daşary ýurtlar bilen gatnaşyklary giňeltmäge, halkymyzyň bolelin durmuşda ýaşamagyny gazanmaga gönükdirilen syýasatynyň dabaralanýandygyny çäksiz guwanç bilen bellediler. Dabarada monumenti guran gurluşykçylara hormatly Prezidentimiziň adyndan gymmat bahaly sowgatlar gowşuryldy. Bu ýerde medeniýet işgärleri bagtyýarlyk döwrümizi, Gahryman Arkadagymyzyň durmuşa geçirýän ilhalar syýasatyny, Watanymyzy wasp edýän aýdymlary we tanslary bilen çärä gatnaşyjylara ruhy lezzet paýladylar.
Ýurdumyzyň ykdysadyýetiniň ulag we aragatnaşyk ulgamynda durmuşa geçirilýän halkara ähmiýetli möhüm işleriň beýanyna öwrülen monumentiň beýikligi 28 metre barabar bolup, ol demir ýol, awtoulag, howa, suw ulaglaryny alamatlandyrýan aşakdan ýokarlygyna uzaýan şekilleriň iň ýokarsynda ýer togalagynyň şekili ýerleşdirilen görnüşde ýerine ýetirilipdir. Ýer şarynyň şekiliniň ýüzünde bolsa «Türkmenhowaýollarynyň» nyşany bolan laçynyň şekili ýerleşdirilipdir.
Tegelek görnüşli meýdanyň ortasynda ýerleşen monumente eltýän ýodalar gurlup, olaryň ugrunda gelşikli çyralar, baglar we güller oturdylypdyr. Binada ornaşdyrylan dürli reňkli yşyklar oňa gijelerine gaýtalanmajak gözellik çaýýar. Täze bina hormatly Prezidentimiziň ýurdumyzy ösdürmegiň, halkymyzyň abadan durmuşda ýaşamagynyň bähbidine alyp barýan beýik işleriniň ýene-de bir çeper beýanyna öwrüldi.