18-nji noýabrda Bütindünýä Göreldeli kakalar güni mynasybetli Aşgabatdaky “Berkarar” söwda we dynç alyş merkezinde Türkmenistanyň Hökümeti bilen ÝUNISEF-iň guramagynda “Çaga ömrüniň ilkinji 1000 güni onuň bagtly geljeginiň gözbaşydyr” ady bilen köpçülikleýin dabaraly çäre geçirildi. Oňa Türkmenistanyň bilim edaralarynyň, jemgyýetçilik guramalarynyň, daşary ýurt ilçihanalarynyň, ýokary okuw mekdepleriniň, habara beriş serişdeleriniň işgärleri bilen birlikde söwda merkezine dynç almaga gelen ene-atalar we olaryň körpejeleri gatnaşdylar. Ýakynda kabul edilen “Çaga ömrüniň ilkinji 1000 güni onuň bagtly geljeginiň gözbaşydyr” atly maksatnamanyň çäklerinde geçirilen dabaranyň esasy maksady halk köpçüligine çaganyň irki ösüşinde ejäniň terbiýesi bilen birlikde kakanyň hem ähmiýetli ornuny düşündirmekden ybarat boldy.
ÝUNISEF-iň başlangyjy boýunça dünýäniň 90-dan gowrak ýurdunda geçirilen dabaraly çäräniň başynda söwda we dynç alyş merkeziniň giň eýwanynda çaganyň irki ösüşi boýunça maslahat beriş nokatlary işledi. Bu ýerde bilim we saglyk ulgamynyň hünärmenleri, Türkmenistanyň Gyzyl Ýarymaý Milli jemgyýetiniň meýletinçiler topary çaganyň irki ösüşi boýunça ene-atalara peýdaly maslahatlary bilen çykyş etdiler. Ene-atalara çaga terbiýesine degişli maslahatlar, kitapçalar, wideolar jemlenen diskler paýlandy. Körpejeler üçin bolsa dürli ertekilerdäki gahrymanlaryň şekilleri, oýnawaçlar bilen bezelen sahna meýdançasynda surat çekip, dürli oýnawaçlardan jaý gurup, şekil ýasap öz ukyplaryny açyp görkezmekleri üçin mümkinçilikler döredildi.
Adamyň kemala gelşi barada käbir alymlar „ nesil yzarlaýar“ diýip çäklense, käbiri berilýän terbiýä, bilime baglydyr diýmek bilen, ene-atalaryň nesil terbiýesine gaty uly üns bermelidiklerini nygtaýarlar.Ýöne soňky döwürde beýniniň fiziologiýasynda, çaga psihologiýasynda geçirilen tejribeleriň esasynda ýaş nesliň akyl taýdan kemala gelşi başky 3 ýylynda amala aşýar diýen netijä gelýärler.
“Çaga ömrüniň ilkinji 1000 güni onuň bagtly geljeginiň gözbaşydyr” atly çäräniň hem açylyş dabarasynda bellenilişi ýaly, çaga dünýä inen gününden başlap, 1000 günüň dowamynda adamyň üstünlikli geljeginiň başlangyjynyň kemala gelýändigi anyklanyldy. Bu döwür çaga beýnisiniň has işjeň ösýän wagtydyr. Hut şonuň üçin hem ene-ata perzentleriniň ösüşiniň irki döwründen başlap, çaganyň beýnisiniň kemala gelmegine ýardam berýär. Ene-ata perzendine bolan söýgüsi we aladasy arkaly onuň üstünlikli geljeginiň düýbüni tutýar.
Göreldeli kakalar gününe bagyşlanan dabaraly çäräniň esasy bölegi hem kakalaryň öz çagajyklary bilen birlikde guralan dürli bäsleşiklere gatnaşyp, ene-atanyň perzent terbiýesindäki ähmiýetini açyp görkezmeklerinden ybarat boldy. Kakalar sahnada özara bäsleşmek bilen, ejeler bilen deň hatarda kakalaryň hem çaga terbiýesinde uly ornunyň bardygyny görkezdiler. Bäsleşige kakalaryň çagajyklary bilen gatnaşmaklary, berilýän ýumuşlary bilelikde ýerine ýetirmekleri körpejeleriň şatlygyny has-da artdyrdy, olarda maşgala mukaddesligi düşünjesiniň berkemegine ýardam etdi. Çagajyklara topy tora düşürmäge ýardam bermek, gyzjagazlaryň saçyny örmek, körpejeleriň wagtlaryny şadyýan geçirmeklerini gazanmak ýaly şertlerde geçirilen bäsleşikler dabaranyň şowhunyny has-da artdyrdy. Ýeňiji kakalar we olaryň çagajyklary gymmat bahaly sowgatlar bilen sylaglandylar. Şeýle-de çäräniň dowamynda çaganyň irki ösüşine degişli sowallar berlip, dogry jogap berenler höweslendirildi. Bäsleşik diňe bir kakalaryň arasynda däl, eýsem ejeleriň hüwdi, körpejeleriň goşgy aýtmagy ýaly şertler boýunça hem geçirildi.
Dabaraly çäräniň dowamynda belli estrada ýyldyzlarynyň ýerine ýetirmeginde aýdym-sazlaryň çykyşlaryň, tanslaryň ýerine ýetirilmegi söwda merkezine çagajyklary bilen dynç almaga gelen ildeşlerimiziň ruhuny has-da belende göterdi.
“Çaga ömrüniň ilkinji 1000 güni onuň bagtly geljeginiň gözbaşydyr” ady bilen geçirilen köpçülikleýin dabaraly çäreden fotoreportažy şu ýerden görüp bilersiňiz.
Aýsenem NURLYÝEWA.
