Fitnes pudagy bu ugra yzygiderli eýerýänleri nazarda tutmak bilen, bökülýän ýüpleriň giň haryt görnüşini hödürleýär. Materiallar, funksional mümkinçilikleri (datçikler, böküşleri we kaloriýalary sanaýjy), ölçegler — bularyň hemmesi özbaşdak laýyk gelýän enjamy saýlamaga mümkinçilik berýär.
Emma, köpdürlüligine garamazdan, bökülýän ýüpleriň ählisiniň maksady welin bir: bökmek.
Nähili dogry bökmelidigi, onda-da saglygyňa zyýan ýetirmezden, ýüpde bökmekde nämeleri göz öňünde tutmalydygy barada osteopat-lukman Wladimir Žiwotow AiF.ru internet neşirine gürrüň berdi.
Bökmegiň peýdalary
Bökülýän ýüp — kardio saglygyny türgenleşdirmek üçin ýönekeý, ýöne täsirli guraldyr. Hem horlanmaga, hem çydamlylygy we işleýiş ukybyny ýokarlandyrmaga kömek edýär. Bökülýän ýüpüň köptaraplylygy ony sport we krossfitden söweş sungatyna çenli dürli sport görnüşlerinde ulanmaga mümkinçilik berýär. Bahasy bolsa islendik adam üçin elýeterlidir.
Kardio maşklarynyň arasynda bökülýän ýüp energiýa sarp etmekde öňdebaryjy orny eýeleýär. Ondan peýdalanmak bilen, 30 minutlyk işjeň maşkda 300-400 kaloriýa ýakyp bilersiňiz.
Ýüpde bökmegiň peýdalarynyň kaloriýany ýakmakdan has ýokarydygyny bellemek gerek. Bu türgenleşik aýaklary güýçlendirýär, dem alyş we ýürek-damar ulgamlarynyň işleýşini kadalaşdyrýar. Arkanyň goşa, üç we kesiş öwrümlerini ulanmak hereketleriň utgaşdyrylmagyny ep-esli gowulaşdyryp biler.
Ýüpde bökmek — aýaklaryňyza, ýanbaşyňyza we bil ýanyňyza gönükdirilen toplumlaýyn beden maşklarydyr. Ol buduň içki böleginiň ýagyny ýakmaga, aşgazany berkitmäge, ýürek we gan damarlarynyň işleýşini sazlamaga kömek edýär. Yzygiderli bökmek gan basyşyny kadalaşdyrýar (ýöne gipertoniýaňyz bar bolsa, ýüpde bökmezden ozal lukman bilen maslahatlaşyň) we bedeni kislorod bilen doldurýar.
Ýüpde bökülende haýsy myşsalar işjeň bolýar?
Bökülýän ýüp myşsalaryň birgiden toparyny ulanýar: kwadrisepsler, aýak bisepsleri we beýlekiler. Ýanbaş we press muňa gytaklaýyn goşulýar. Bilekleriň we elleriň kiçijik myşsalary belli bir intensiwlik bilen işleýär. Oňurga giňeldijileri stabilizator bolup, bedeni göni saklamaga kömek edýär. Şeýle-de bolsa, ýüpüň oňurga nähili täsir edýändigi sorag döredýär.
Bökülýän ýüpüň zyýany
Bökülýän ýüp — adamyň saglygyna, esasanam oňurga oňaýly we ýaramaz täsir edip biljek güýçli maşkdyr.
Bu ýüpüň diňe saglyk müşgilligi bolmadyk adamlar üçin amatlydygyny ýatdan çykarmaly däldiris.
Garşy görkezmeler: kelleçanagyň, arkanyň ýa-da ýokary oňurga böleginiň şikesi, boýnuň ýa-da ondan aşaky bölegiň dowamly agyrylary, içki organlaryň käbiriniň bolmazlygy ýaly ýagdaýlarda maslahat berilmeýär.
Bu ýagdaýlarda bökülýän ýüp agyrynyň güýçlenmegine ýa-da bar bolan müşgillikleriň agyrlaşmagyna sebäp bolup biler.
Ýüpde böküp bilmeýän bolsaňyz ruhdan düşmeli däl. Ylgamak munuň ornuny tutup biljek ajaýyp maşkdyr! Ylgalan mahaly elleriň we aýaklaryň ýokaryk-aşak yzygiderli hereketi ýüpde böken ýalydyr, ýöne böküşleriň aşaky beýikligi sebäpli az intensiwligi bilen ýüpde bökene garanyňda has ýumşak bolýar. Ylgamak tizligi üýtgedip bolýandygy üçin bedene düşýän agramy sazlamagy aňsatlaşdyrýar.
Islendik maşklara, esasanam öýde ýerine ýetirilýän türgenleşiklere düşünip, peýdalydyr zyýanly täsirlerine doly göz ýetirip çemeleşmek möhümdir. Ýüpde böküp başlamazdan ozal, öz mümkinçilikleriňize we saglyk ýagdaýyňyza obýektiw baha bermelidir.
Şeýle-de okaň:
