Düýn Aşgabatda Türkmenistanyň daşary işler ministri Raşid Meredow bilen Özbegistanyň Türkmenistandaky Adatdan daşary we Doly ygtyýarly ilçisi Rawşanbek Alimowyň arasynda duşuşyk geçirildi. Bu barada Türkmenistanyň DIM-iniň resmi saýtynda habar berilýär.
Taraplar 2024-nji ýylyň 21-nji martynda BMG-niň Baş Assambleýasynyň 78-nji sessiýasynyň 63-nji plenar mejlisinde Türkmenistanyň başlangyjy bilen «Halkara parahatçylyk we ynanyşmak ýyly» diýlip yglan edilen 2025-nji ýylyň başynda geçirilýän duşuşygyň aýratyn ähmiýete eýedigini nygtadylar.
R.Meredowyň bellemegine görä, Türkmenistan Halkara parahatçylyk we ynanyşmak ýylynyň şygaryna esaslanýan çäreleri geçirmek üçin halkara hyzmatdaşlar bilen bilelikdäki tagallalary durmuşa geçirmegi meýilleşdirýär.
Taraplar syýasy-diplomatik, söwda-ykdysady hem-de medeni-ynsanperwer ugurlarda ikitaraplaýyn gatnaşyklaryň mundan beýläk-de ösdürilmegi barada pikir alyşdylar.
