Prezident Serdar Berdimuhamedow wise-premýer T.Atahallyýewiň hem-de welaýatlaryň häkimleriniň gatnaşmagynda sanly ulgam arkaly iş maslahatyny geçirdi. "Watan" habarlar gepleşiginde habar berlişi ýaly, iş maslahatynda ýurduň oba hojalyk toplumynda hem-de welaýatlarynda alnyp barylýan işler bilen baglanyşykly meselelere garaldy.
Ilki bilen, häkimler welaýatlaryň ekerançylyk meýdanlarynda alnyp barylýan işleriň ýagdaýy barada hasabatlary berdiler. Hasabatlarda bellenilişi ýaly, bugdaý ekilen meýdanlarda häzirki wagtda mineral we organiki dökünler bilen iýmitlendirmek işleri alnyp barylýar. Geljek ýylyň hasyly üçin gowaça ekiljek meýdanlarda topragy fosfor döküni bilen gurplandyrmak, sürüm hem-de tekizleýiş işleri dowam etdirilýär. Ýazky oba hojalyk işlerinde ulanyljak tehnikalary we gurallary möwsüme doly taýýar etmek boýunça zerur işler alnyp barylýar.
Häkimler Täze ýyl baýramçylygy mynasybetli dabaralary guramaçylykly geçirmek, welaýatlaryň bazarlarynda we dükanlarynda haryt bolçulygyny üpjün etmek boýunça degişli işleriň geçirilýändigi barada hem hasabatlarda aýtdylar.
Döwlet Baştutany hasabatlary diňläp, häzirki wagtda dowam edýän möwsümleýin oba hojalyk işleriniň möhüm ähmiýetine ünsi çekdi hem-de häkimlere bugdaý meýdanlaryndaky ideg işleriniň agrotehnikanyň kadalaryny berk berjaý etmek arkaly ýerine ýetirilmegini, gowaça ekiljek meýdanlaryň möwsüme talabalaýyk taýýar edilmegini gözegçilikde saklamagy tabşyrdy.
Iş maslahatynyň barşynda wise-premýer T.Atahallyýew hem ýurtda dowam edýän möwsümleýin oba hojalyk işleriniň barşy barada hasabat berdi. Hasabatda Mary welaýatynda ýetişdirilen gant şugundyrynyň hasylyny ýygnap almak hem-de bu möwsümi öz wagtynda geçirmek boýunça zerur çäreleriň görülýändigi barada hem aýdyldy.
Prezident Serdar Berdimuhamedow hasabaty diňläp, oba hojalyk pudagynyň öňünde durýan möhüm wezipeleri üstünlikli ýerine ýetirmäge toplumlaýyn çemeleşmegiň zerurdygyny belledi we şunuň bilen baglylykda, häzirki wagtda dowam edýän möwsümleýin işleriň ýokary hilli we guramaçylykly geçirmegi gözegçilikde saklamagy wise-premýere tabşyrdy.
Döwlet Baştutany iş maslahatyna gatnaşyjylara ýüzlenip, häzirki wagtda alnyp barylýan möwsümleýin oba hojalyk işlerine ýene-de bir gezek ünsi çekdi we bugdaýa ideg işleriniň agrotehnikanyň kadalaryny berk berjaý etmek arkaly ýerine ýetirilmegini üpjün etmegi tabşyrdy.
Prezident Serdar Berdimuhamedow ýazky ekiş möwsümini öz wagtynda hem-de talabalaýyk geçirmek üçin taýýarlyk işleriniň guramaçylykly alnyp barylmagyny gözegçilikde saklamagy tabşyrdy.
