25-nji noýabrda Türkmenistanyň Prezidenti Serdar Berdimuhamedow wise-premýer T.Atahallyýewiň hem-de welaýatlaryň häkimleriniň gatnaşmagynda iş maslahatyny geçirdi. "Watan" habarlar gepleşiginde habar berlişi ýaly, iş maslahatynda ýurduň oba hojalyk toplumynda we welaýatlarynda alnyp barylýan işlere hem-de Oba milli maksatnamasynyň ýerine ýetirilişi bilen baglanyşykly meselelere garaldy.
Ilki bilen, welaýatlaryň häkimleri sebitleriň ekerançylyk meýdanlarynda alnyp barylýan işleriň ýagdýay barada hasabatlary berdiler.
Hasabatlarda bellenilişi ýaly, häzirki wagtda welaýatlarda pagta hasylyny soňky hanasyna çenli ýygnap almak boýunça zerur çäreler görülýär. Şunda oba hojalyk tehnikalaryndan netijeli peýdalanylýar, ýygnalan hasyl kabul ediş harmanhanalarynda, pagta arassalaýjy kärhanalarda bökdençsiz kabul edilýär. Bugdaý ekilen meýdanlarda agrotehnikanyň talaplaryna laýyklykda ideg etmek, hususan-da, ösüş suwuny tutmak, ekini mineral dökünler bilen iýmitlendirmek işleri alnyp barylýar.
Hasabatlarda geljek ýylyň hasyly üçin welaýatlarda gowaça ekiljek meýdanlary ekiş möwsümine taýýarlamak üçin ýerleri mineral dökünler bilen gurplandyrmak, daş-töweregini arassalamak we sürüm işleriniň geçirilýändigi barada hem aýdyldy.
Häkimler welaýatlarda geljek ýyl oba hojalyk işlerinde ulanyljak tehnikalary we gurallary möwsüme taýýar etmek boýunça ýerine ýetirilýän degişli işler hakynda hem hasabat berdiler.
Şeýle-de hasabatlarda pagta hasyly üçin önüm öndürijiler bilen hasaplaşyklaryň öz wagtynda geçirilýändigi, Oba milli maksatnamasyny durmuşa geçirmegiň çäklerinde, welaýatlarda ýerine ýetirilýän degişli işler barada hem aýdyldy.
Prezident Serdar Berdimuhamedow hasabatlary diňläp, pagta hasylyny iň soňky hanasyna çenli ýygnap almagyň, bugdaý ekilen ýerlerde ideg işleriniň agrotehnikanyň talaplaryna laýyk geçirilmegini üpjün etmegiň zerurdygyny aýtdy we bu babatda häkimlere anyk tabşyryklary berdi.
Iş maslahatynyň barşynda wise-premýer T.Atahallyýew hem ýurtda dowam edýän möwsümleýin oba hojalyk işleriniň barşy barada hasabat berdi. Hasabatyň çäklerinde Mary welaýatynda gant şugundyrynyň hasylyny ýygnap almak we bu möwsümi öz wagtynda geçirmek boýunça degişli işleriň geçirilýändigi barada hem aýdyldy.
Döwlet Baştutany hasabaty diňläp, dowam edýän möwsümleýin oba hojalyk işleriniň möhüm ähmiýetine ünsi çekdi we wise-premýere şol işleriň talabalaýyk ýerine ýetirilmegini gözegçilikde saklamagy tabşyrdy.
Prezident Serdar Berdimuhamedow iş maslahatyna gatnaşyjylara ýüzlenip, welaýatlaryň gowaça meýdanlarynda galan pagtany iň soňky hanasyna çenli ýygnap almagyň, bugdaý ekilen ýerlerde ideg işleriniň geçirilişine berk gözegçilik etmegiň, bugdaý meýdanlarynda birinji ösüş suwuny tutmak, ekini mineral dökünler bilen iýmitlendirmek işlerini agrotehniki möhletlerde geçirmegiň, haşal otlara garşy işleriň öz wagtynda alnyp barylmagynyň, ekilen bugdaýdan kadaly gögeriş alynmagyna aýratyn üns bermegiň möhümdigini belledi.
Döwlet Baştutany geljek ýylyň hasylynyň düýbüni tutmak meselesine ünsi çekip, gowaça ekiljek ýerlerde degişli agrotehniki işleri öz wagtynda geçirmegi tabşyrdy. Şeýle-de daýhan birleşiklerinde pagta öndürijiler bilen hasaplaşyklary öz wagtynda geçirmek tabşyryldy.
Prezident Serdar Berdimuhamedow geljek ýyl oba hojalyk işlerinde ulanyljak tehnikalarda we gurallarda abatlaýyş işlerini talabalaýyk ýola goýmagy, welaýatlarda pagta we bugdaý öndürijiler bilen hyzmat edýän edara-kärhanalaryň arasynda şu ýylyň pagta, geljek ýylyň bugdaý hasyly üçin ýerine ýetirilen işler boýunça hasaplaşyklaryň öz wagtynda geçirilmegini üpjün etmegi tabşyrdy.
Şeýle-de döwlet Baştutany Mary welaýatynda gant şugundyrynyň hasylyny zaýasyz ýygnap almagy, welaýatlarda Oba milli maksatnamasynyň ýerine ýetirilişini berk gözegçilikde saklamagy tabşyrdy.
