Türkmenistanyň Prezidenti oba hojalyk pudagynyň meseleleri boýunça iş maslahatyny geçirdi, 13-nji noýabrda Türkmenistanda «Gorkut ata» halkara kinofestiwaly başlanýar, Türkmenistanda tennis boýunça «Ashgabat Open 2024» atly halkara ýaryşy başlandy we beýleki habarlar
Türkmenistanda
1. Türkmenistanyň Prezidenti Serdar Berdimuhamedow Ministrler Kabinetiniň Başlygynyň orunbasary T.Atahallyýewiň hem-de welaýatlaryň häkimleriniň gatnaşmagynda iş maslahatyny geçirdi. Onda ýurduň oba hojalyk toplumynda alnyp barylýan işlere hem-de Oba milli maksatnamasynyň ýerine ýetirilişi bilen baglanyşykly meselelere garaldy. Iş maslahatynda welaýatlarda pagta ýygymynyň we ýygnalan hasyly kabul ediş harmanhanalarynda bökdençsiz kabul etmek işleriniň dowam edýändigi aýdyldy. Şeýle hem bugdaý ekilen meýdanlarda ideg işleri, hususan-da, gögeriş we ösüş suwuny tutmak işleri ýerine ýetirilýär.
2. 13-nji noýabrda Türkmenistanda «Gorkut ata» Halkara kinofestiwaly öz işine başlaýar. Festiwalyň açylyş dabarasy Aşgabadyň Mukamlar köşgünde günüň ikinji ýarymynda geçiriler. Şol günüň birinji ýarymynda kinoforumyň myhmanlary we gatnaşyjylary üçin Änewiň taryhy ýerleri boýunça gezelenç guralar, şeýle hem olar türkmen paýtagtynyň gözel ýerlerine tanyşlyk syýahatyny amala aşyrarlar. Festiwal 15-nji noýabra çenli dowam eder. Iki günüň dowamynda «Aşgabat» kinoteatrynda we «Türkmenistan» hem-de «Watan» kinokonsert merkezlerinde festiwalyň bäsleşige gatnaşýan filmleriniň görkezilişleri geçiriler.
3. Türkmenistanyň Bilim ministrliginde britan wekiliýeti bilen duşuşyk geçirildi. Saparyň maksady Türkmenistanyň bilim edaralary bilen tanyşmakdan, olaryň ýolbaşçylary we iňlis dili mugallymlary bilen duşuşyklar geçirmekden, şeýle hem iňlis dilini okatmagyň häzirki zerurlyklaryny öwrenmekden ybaratdyr. Duşuşykda taraplar Türkmenistanda IELTS synaglaryny tabşyrmak üçin şertleri döretmegiň mümkinçiliklerini ara alyp maslahatlaşdylar. Şeýle hem söhbetdeşler iki ýurduň ýokary okuw mekdepleriniň arasynda, şol sanda iki diplom almak maksatnamalarynyň çäklerinde hyzmatdaşlygy ösdürmek meselesiniň üstünde durup geçdiler.
4. 11-nji noýabrynda Türkmenistanyň daşary işler ministri Raşid Meredow bilen BMG-niň Türkmenistandaky Hemişelik utgaşdyryjysy Dmitriý Şlapaçenkonyň arasynda duşuşyk geçirildi. Duşuşygyň dowamynda taraplar Türkmenistan bilen BMG we onuň ýöriteleşdirilen edaralarynyň arasyndaky hyzmatdaşlygyň wajyp ugurlary boýunça pikir alyşdylar. Duşuşykda howanyň üýtgemegi bilen baglanyşykly meselelere aýratyn üns berildi. Taraplar 2024-nji ýylyň ahyryna çenli geçiriljek bilelikdäki çärelere taýýarlyk meselelerini, şeýle hem BMG-niň Baş Assambleýasy tarapyndan Türkmenistanyň başlangyjy bilen Halkara parahatçylyk we ynanyşmak ýyly hökmünde yglan edilen 2025-nji ýyl üçin göz öňünde tutulýan meýilnamalary ara alyp maslahatlaşdylar.
5. 40 ýurtdan 600-den gowrak wekiliýet 2024-nji ýylyň 26-27-nji noýabrynda Aşgabatda «Halkara ulag-üstaşyr geçelgeleri: özara arabaglanyşyk we ösüş – 2024» atly 3-nji halkara maslahata we sergä gatnaşmak üçin ýygnanar. Gatnaşyjylaryň hatarynda halkara we milli kompaniýalaryň, halkara guramalaryň hem-de hökümet edarlarynyň wekilleri bolar.
Dünýäde
1. Sişenbe güni Azerbaýjanyň paýtagtynda BMG-niň Howanyň üýtgemegi baradaky Çarçuwaly konwensiýasyna gatnaşyjy taraplaryň maslahatynyň 29-njy sessiýasynyň döwlet Baştutanlarynyň sammitiniň açylyş dabarasy boldy. Bakuw stadionyna gelen myhmanlary Azerbaýjanyň Prezidenti Ilham Aliýew we BMG-niň Baş sekretary Antoniu Guterriş garşy aldy. 11-nji noýabrda öz işine başlan iki hepdelik maslahat 22-nji noýabra çenli dowam eder we Azerbaýjanyň taryhyndaky howa bilen baglanyşykly iň iri çäre bolar. Gün tertibinde esasy mesele howanyň maliýeleşdirilmegi boýunça täze köpçülikleýin maksadyň ara alnyp maslahatlaşylmagy bolar.
https://turkmenportal.com/blog/84647/v-baku-prohodit-ceremoniya-otkrytiya-sammita-liderov-cop29
2. Dubaýda täze bilim taslamasy okatmak prosesine wideo oýunlaryny ornaşdyrmak arkaly adaty mekdep bilimi maksatnamasyny üýtgetmäge taýýarlanýar. Taslama köpçüligiň wideo oýunlaryna bolan garaýşyny üýtgetmegi maksat edinýär. Döredijileriň bellemegine görä, gerimi boýunça aýdym-saz we kino sungaty pudaklarynyň bilelikdäki netijesinden hem has giň bolan oýun pudagy ýaşlaryň hünär taýdan ösmegi üçin uly mümkinçilikleri açýar. BAE-de ilatyň dörtden biriniň işjeň oýunçy boljakdygy we Saud Arabystanynda bu görkezijiniň 60%-e ýetjekdigi çaklanylýar.
Sport täzelikleri
1. Türkmenistanyň paýtagtynda 14 ýaşa çenli oglan-gyzlaryň arasynda geçirilýän «Ashgabat Open 2024» halkara tennis bäsleşigi başlady. Ýaryşyň açylyş dabarasy paýtagtymyzyň Olimpiýa şäherjiginiň çäginde geçirildi. Bäsleşige dünýäniň 12 ýurdundan ýaş zehinler gatnaşýarlar. Sport ýaryşlaryndan daşary, ýaryşa gatnaşyjylar üçin baý medeni maksatnama taýýarlandy. Bäsleşigiň jemleýji oýunlaryny we ýeňijileri sylaglamak dabarasyny 16-njy noýabrda geçirmek meýilleşdirilýär.
2. Türkmenistanda ilkinji höwesjeň «Run Rush» ylgaw klubynyň wekilleri «Samarkand Marathon 2024» atly altynjy halkara haýyr-sahawat ylgawynda üstünlikli çykyş etdiler. Giň gerimli sport çäresine 43 ýurtdan 5 müňden gowrak adam gatnaşdy. Marafon Samarkandyň taryhy merkezinde geçirildi. Türkmen klubyna Selbi Hojaýewa, Guwanç Gubaýew we Timur Kulmuradow wekilçilik etdi. Ylgawa gatnaşanlar çäräniň ýokary derejede guralandygyny we sport baýraçylygynyň täsin gurşawyny bellediler.
