Türkmenistan milli pul birliginiň 31 ýyllygyny belleýär, Aşgabatda sport diplomatiýasy boýunça täze halkara başlangyjy ara alnyp maslahatlaşyldy, Kazanda türkmen suratkeşiniň şahsy sergisi açyldy we beýleki habarlar
Türkmenistana
1. Türkmenistan milli pul birliginiň – manadyň dolanyşyga girizilmeginiň 31 ýyllygyny belleýär. Bu döwürde ýurduň bank ulgamy sanly tehnologiýalary ösdürmekde we halkara maliýe bazaryna utgaşykly goşulmakda uly üstünlikleri gazandy. Baýramçylyk mynasybetli Türkmenistanyň Prezidenti Serdar Berdimuhamedow bank ulgamynyň işgärlerini we ähli türkmen halkyny gutlady. «Milli manadymyzyň dolanyşyga girizilmegi ýurdumyzyň ykdysadyýetiniň sazlaşykly ösmegi, kadaly pul dolanyşygynyň we ýeke-täk döwlet pul-karz syýasatynyň netijeli alnyp barylmagy üçin zerur bolan amatly şertleri döretdi» diýlip, döwlet Baştutanynyň Gutlagynda bellenilýär.
2. Türkmenistanyň DIM-niň Halkara gatnaşyklary institutynda Türkmenistanyň we Hindistanyň başlangyjy esasynda BMG-niň Baş Assambleýasy tarapyndan täze «Birleşen Milletler Guramasynyň oýunlary» atly Kararnamanyň biragyzdan kabul edilmegi ara alnyp maslahatlaşyldy. Halkara maslahata ýurduň DIM-niň ýolbaşçylary, diplomatik wekilhanalaryň, jemgyýetçilik guramalaryň we sport bireşikleriniň wekilleri gatnaşdylar. Maslahatyň dowamynda Türkmenistanyň köpçülikleýin bedenterbiýe hereketini ösdürmek, jemgyýetde sagdyn durmuş ýörelgesini ornaşdyrmak we sport diplomatiýasyny ösdürmek baradaky başlangyçlarynyň dünýä jemgyýetçiligi tarapyndan giňden goldanylýandygy bellenildi.
3. Şu günler Tatarystanyň Döwlet şekillendiriş sungaty muzeýiniň «Hazine» milli sungat galereýasynda türkmen suratkeşi Berdiguly Amansähedowyň «Başlangyç – sazlaşyk – kämillik: filosofiki dünýägaraýyş» atly şahsy sergisi geçirilýär. Bu ýerde suratkeşiň 2013 – 2022-nji ýyllar aralygynda döreden 40-dan gowrak suraty görkezilýär. Olaryň hatarynda «Müň bir gije», «Ýagty Gündogar», «Garagumlaryň Güneşi», «Çäksizligiň formulasy», «Naryň yşygy» we beýleki eserler bar.
4. 3 — 5-nji noýabr aralygynda Türkmenistanyň Söwda-senagat edarasynda «Türkmenistanyň gurluşygy, senagaty, energetikasy — 2024» atly 12-nji halkara sergi geçiriler. Ýurduň Gurluşyk we senagat toplumynyň işgärleriniň gününe bagyşlanan bu giň gerimli çäre dünýäniň dürli künjeginden 100-den gowrak kompaniýany bir ýere jemlär. Kompaniýalar gurluşyk, senagat we energetika pudagynda gazanylan iň täze tehnologiki çözgütleri we enjamlary görkezerler.
5. Russiýanyň kompaniýalary Türkmenistan bilen elektron söwda we ulag ugurlarynda geljekki taslamalary amala aşyrmaga, Astrahan bilen Türkmenbaşy şäherleriniň arasynda göni howa gatnawyny açmaga, şeýle hem Hazar deňzinde kruiz gämi gatnawyny guramaga gyzyklanma bildirýärler. Bu barada Russiýanyň ykdysady ösüş ministriniň orunbasary Dmitriý Wolwaç Hökümetara türkmen-rus toparynyň mejlisiniň netijeleri boýunça habar berdi.
Dünýäde
7. Rumyniýaly pianinoçy Zoltan Turzo klawişalara 30 sekuntda 500 gezek basyp, aýdym-saz ussatlygynyň täze belentligine çykdy. Ginnesiň rekordlar kitaby üçin wideo düşürilen bu üstünlik onuň ejesiniň hatyrasyna geçirilen konsertde gazanyldy. Ozalky üstünlik şol bir wagt dowamlylygynda klawişalara 495 gezek basmagy başaran ýapon sazandasy Keýta Hattorä degişlidi.
8. Madridiň «Realy» Ispaniýadaky suw joşgunyndan ejir çekenlere goldaw bermek üçin bir million ýewro bagyş etdi. Ispaniýada güýçli ýagyş we suw joşguny 140 adamyň ölmegine sebäp boldy, olaryň köpüsi Walensiýa welaýatynda ýaşaýardy. Bu betbagtçylyk sebäpli Ispaniýanyň hökümeti üç günlük ýas yglan etdi. Suw joşguny Walensiýanyň ýol infrastrukturasyna uly zyýan ýetirdi we 60-dan gowrak ýoluň ýapylmagyna sebäp boldy. Ispaniýanyň Patyşalyk futbol federasiýasy şu hepde Walensiýa welaýatynda meýilleşdirilen birnäçe oýny, şol sanda 2-nji noýabrda geçiriljek «Walensiýa» bilen «Realyň» arasyndaky La Liganyň 12-nji tapgyrynyň oýnuny yza süýşürdi. Ispaniýadaky beýleki oýunlaryň hemmesi suw joşgunynyň pidalarynyň hatyrasyna bir minutlyk dymyşlyk bilen başlar.
Sport täzelikleri
9. Türkmenistanyň Tennis federasiýasynyň wekili Begmuhammet Mommaýew «ATP 250 Almaty Open» atly professional tennis ýaryşynyň guramaçylyk toparynyň düzümine girizildi. Bu şeýle derejedäki ýaryşlaryň guramaçylygyna türkmen hünärmeniniň ilkinji gezek çekilmegidir. 1 million dollardan gowrak baýrak gaznasy bolan «Almaty Open» ýaryşyna 15 ýurtdan 32 professional tennisçi gatnaşdy. Ýaryşda russiýaly Karen Haçanow ýeňiji boldy. Ýaryşyň dowamynda Mommaýew gatnaşyjylary gönükdirmek, hasaba almagy guramak, meýdançany taýýarlamak we islendik guramaçylyk meselelerini çözmäge ýardam bermek işlerine jogapkär boldy.
