Täjigistanyň ulag ministri Azim Ybrahym degişli müdirliklere we edaralara Türkmenistanyň çäginden geçýän ugur boýunça otly gatnawyny synag etmegi tabşyrdy. Has takygy, tabşyryk esasynda synag otlusy «Hytaý — Täjigistan — Özbegistan — Türkmenistan — Eýran — Türkiýe — Ýewropa» multimodal halkara ulag geçelgesiniň ugry boýunça hereket eder. Bu barada Täjigistanyň Ulag ministrliginiň metbugat gullugy habar berdi.
Çeşmede bellenilişine görä, ministr şol bir wagtyň özünde ýurduň demir ýol wagonlaryny we lokomotiwlerini kem-kemden täzelemek, pudagy sanlylaşdyrmak boýunça işleri güýçlendirmek, Eýranyň Çabahar portunda logistika merkezlerini gurmak, ýük we ýolagçy gatnawynyň göwrümini hem-de hilini ýokarlandyrmak, täze üstaşyr demir ýollary gurmak barada hem tabşyryk beripdir.
Ýeri gelende ýatlatsak, Türkmenistanyň we Täjigistanyň Prezidentleriniň arasynda 2023-nji ýylyň maý aýynda Duşenbe şäherinde geçirilen gepleşiklerde ulag pudagy ikitaraplaýyn hyzmatdaşlygyň ileri tutulýan ugry hökmünde görkezilipdi. Şunuň bilen baglylykda, «Hytaý — Täjigistan — Özbegistan — Türkmenistan — Eýran — Türkiýe» ýaly täze multimodal halkara ulag geçelgelerini döretmegiň ähmiýeti nygtalypdy.
Mundan başga-da, ulag pudagyndaky mümkinçilikleri netijeli ulanmak 2023-nji ýylyň awgust aýynda Aşgabatda geçirilen ilkinji Türkmenistan — Täjigistan — Özbegistan sammitiniň hem esasy temalarynyň biri boldy.
