Gurbanguly Berdimuhamedow Kazana iş sapary bilen bardy, 2024-nji ýylda Türkmenistanda altynjy Wena balyny geçirmek meýilleşdirilýär, Çarymyrat Gurbanow futbol emini hökmünde karýerasyny tamamlady we beýleki habarlar
Türkmenistanda
1. Türkmen halkynyň Milli Lideri Gurbanguly Berdimuhamedow Russiýa Federasiýasynyň Tatarystan Respublikasyna iş sapary bilen bardy. Şu günler Kazanda «Russiýa — Yslam dünýäsi: KazanForum» atly XV halkara ykdysady forumy geçirilýär. Türkmenistanyň Halk Maslahatynyň Başlygy bu foruma hormatly myhman hökmünde çagyryldy. Gurbanguly Berdimuhamedow Kazanda Rustam Minnihanow bilen duşuşyk geçirdi. Duşuşygyň dowamynda taraplar nebitgaz, gämi gurluşygy, himiýa senagaty pudaklarynda, awiasiýa tehnikasyny, ýük awtoulaglaryny ibermek babatda, şeýle hem ynsanperwer ulgamda, şol sanda bilim, medeniýet, sungat boýunça üstünlikli hyzmatdaşlygyň alnyp barylýandygyny bellediler. Gurbanguly Berdimuhamedow Türkmenistanyň Russiýa bilen strategik hyzmatdaşlygyň çäklerinde Tatarystan bilen köpugurly gatnaşyklary hemmetaraplaýyn pugtalandyrmagy we giňeltmegi ugur edinýändigini tassyklady.
2. Prezident Serdar Berdimuhamedowyň Türkmen-awstriýa jemgyýetiniň başlygy Neda Berger bilen duşuşygynyň dowamynda şu ýyl Türkmenistanda altynjy Wena balyny geçirmek meselesi ara alnyp maslahatlaşyldy. Prezident Serdar Berdimuhamedowyň belleýşi ýaly, medeni-ynsanperwer ugur türkmen-awstriýa gatnaşyklarynyň möhüm bölegi bolup durýar. Türkmen halkynyň Milli Lideriniň başlangyjy bilen döredilen «Galkynyş» türkmen-awstriýa simfoniki orkestri 2024-nji ýylda 15 ýyllygyny belleýär. Mundan başga-da, türkmen halky bütin dünýäde ykrar edilen nusgawy şahyr, Gündogar edebiýatynyň meşhur şahyry we akyldary Magtymguly Pyragynyň doglan gününiň 300 ýyllygyny ýokary derejede belleýär. Ýatlatsak, birinji Wena baly 2011-nji ýylyň 17-nji sentýabrynda Türkmenistanyň döwlet Garaşsyzlygynyň 20 ýyllygy mynasybetli Aşgabatda geçirildi. Geçen ýyl bal 11-nji oktýabrda Arkadag şäherinde geçirildi.
3. «Daragt» filmi etniki we sebit filmlerine bagyşlanan XVII Çeboksar halkara kinofestiwalynyň bäsleşik maksatnamasynyň çäginde Türkmenistana wekilçilik eder. Festiwal 23 – 29-njy maý aralygynda Çuwaş Respublikasynyň paýtagtynda geçiriler. Türkmen filminiň festiwaldaky ilkinji görkezilişi 27-nji maýda «Wolžskiý» kinoteatrynda bolar. Kinorežissýor Sahysalyh Baýramowyň 2023-nji ýylda Oguzhan adyndaky «Türkmenfilm» birleşiginde surata düşüren «Daragt» atly filminde Beýik Watançylyk urşundan soňky ýyllarda türkmen maşgalasynyň ykbaly barada gürrüň berilýär.
4. Türkmenistanyň at gazanan artisti, pianinoçy Wladimir Mkrtumow ýurduň welaýat merkezlerinde konsert berer. Konsert maksatnamasyna Frederik Şopeniň eserleri girýär. Mkrtumowyň sapary 17-nji maýda Arkadag şäherindäki täze Sungat mekdebindäki konsert bilen başlaýar. Indiki konsert 19-njy maýda Mary sungat mekdebinde bolar. Şol gün pianinoçy Lebap sungat mekdebinde konsert berer. Paýtagtyň diňleýjileri üçin Mkrtumowyň konserti 22-nji maýda «Aşgabat» medeni-dynç alyş seýilgähiniň konsert zalynda geçiriler.
Dünýäde
5. Beýik Britaniýada tanyşdyrylan patyşa Karl III-iň ilkinji resmi portreti köpçüligi geň galdyrdy. Portret GQ-a görä, dünýäde iň meşhur portret suratkeşleriniň biri bolan Jonatan Ýeo tarapyndan çekildi. Britan suratkeşi Kara Delewiniň, Jeýms Kemeronyň, Kewin Speýsiniň we beýleki meşhur şahsyýetleriň portretlerini döretdi. Beýikligi 2,56 metr bolan suratda Karl III gyzyl fonda doly boýunda şekillendirilýär. Patyşanyň egniniň golaýynda metamorfozy we galkynyşy alamatlandyrýan kebelegi görmek bolýar. Köpçüligiň surata bolan garaýşy dürli-dürli boldy. Käbir britaniýalylar adaty portretlerden çetleşilmegini oňlamadylar. Olar gyzyl öwüşginlerde gorkunç we aýylganç alamatlary gördüler.
6. Soňky 30 ýylda aşa yssy howa 150 müňden gowrak adamyň aradan çykmagyna sebäp boldy. Alymlar 43 ýurduň 750 sebitinde ölüm we temperatura baradaky maglumatlary seljerip, bu netijä geldiler. Alymlar 1990-njy we 2019-njy ýyllar aralygynda artkmaç ölümiň ýylda 153 078 adama deňdigini anykladylar. Bu dünýädäki ölümleriň 1%-idir. Yssydan iň köp Ýewropanyň ýaşaýjylary ejir çekýärler, bu ýerde aradan çykýanlaryň sany her 10 millionda 655 adama ýetýär.
Sport habarlary
7. Iň meşhur türkmen eminleriniň biri bolan Çarymyrat Gurbanow 20 ýyldan gowrak dowam eden eminlik karýerasyny tamamlaýandygyny habar berdi. 46 ýaşly Gurbanow Dünýä çempionatlarynyň saýlama oýunlarynda, abraýly halkara ýaryşlarynda we halkara ýoldaşlyk duşuşyklarynda eminlik etdi. Baş emin hökmünde hoşlaşyk oýnunda Gurbanow eminler düzümi bilen Türkmenistanyň Ýokary ligasynyň 15-nji tapgyrynyň «Ahal» we «Nebitçi» toparlarynyň arasyndaky duşuşygyna gatnaşdy.
