Türkmenistanyň Prezidentiniň Moskwa iş sapary tamamlandy, Aşgabatda Beýik Watançylyk urşunda wepat bolanlar hatyralandy, Türkmenistanyň Londondaky ilçihanasy Magtymgulynyň 300 ýyllygy mynasybetli dabara geçirdi we beýleki habarlar
Türkmenistanda
1. Prezident Serdar Berdimuhamedow Russiýa iş saparyny tamamlap, Aşgabat şäherine gaýdyp geldi. Saparyň dowamynda döwlet Baştutany Beýik Watançylyk urşunda gazanylan Ýeňşiň 79 ýyllygy mynasybetli dabaraly çärelere hormatly myhman hökmünde gatnaşdy. 9-njy maýda irden bellenilen wagtda Prezidentiň awtoulag kerweni Kreml binasynyň ýanyna geldi. Bu ýerde Türkmenistanyň döwlet Baştutanyny Russiýanyň Prezidenti mähirli garşylady. Prezident Serdar Berdimuhamedow Kremlden dabaraly harby ýörişiň geçirilýän ýerine — Gyzyl meýdanyň merkezi münberine tarap ugrady. Harby ýöriş tamamlanandan soňra, asylly däbe görä, döwlet Baştutanlary Näbelli esgeriň guburyna gül desselerini goýdular. Dabaraly çäreler tamamlanandan soňra, Prezident Serdar Berdimuhamedow «Wnukowo — 2» Halkara howa menziline gelip, bu ýerden Aşgabada ugrady.
2. London şäherinde beýik türkmen şahyry we akyldary Magtymguly Pyragynyň 300 ýyllygyna bagyşlanan dabaraly çäre geçirildi. Çäre Türkmenistanyň Beýik Britaniýadaky Ilçihanasy tarapyndan guraldy. Çäräniň dowamynda Magtymguly Pyragynyň goşgulary okaldy, şeýle hem Türkmenistanyň ösüşine we Magtymguly Pyragynyň ömri we döredijiligine bagyşlanan wideoşekiller görkezildi. Dabaranyň resmi bölegi tamamlanandan soňra myhmanlar Magtymguly Pyragynyň eserleriniň, türkmen halkynyň milli egin-eşikleriniň, şaý-sepleriniň we amaly-haşam sungatynyň önümleriniň sergisini synladylar.
3. Aşgabatda A.S.Puşkin adyndaky bilelikdäki türkmen-rus orta mekdebiniň çäginde däp bolan Ölmez-ýitmez polkuň ýörişi geçirildi, oňa müňden gowrak adam – mekdep okuwçylary, olaryň ene-atalary, mugallymlar düzümi, jemgyýetçilik wekilleri we Russiýanyň ilçihanasynyň diplomatlary gatnaşdy.
4. Türkmenistanyň Döwlet daşary ykdysady iş bankynyň başlygy Rahymberdi Jepbarowyň ýolbaşçylygyndaky Türkmenistanyň wekiliýeti Abu-Dabi şäherinde geçirilen XIII Halkara maýa goýum forumyna we sergisine gatnaşdy. Forumyň çäklerinde türkmen wekiliýeti Azerbaýjandan, Gazagystandan, Özbegistandan, BAE-den hyzmatdaşlary bilen birnäçe ikitaraplaýyn duşuşyklary geçirdi. Duşuşyklarda ykdysady gatnaşyklary ilerletmek, tebigy baýlyklardan netijeli peýdalanmak, energiýa bazarlaryny ösdürmek, özara bähbitli iri taslamalara maýa goýumlaryny çekmek, iri ýataklarda öndürijiligi ýokarlandyrmak ugrundaky täze aragatnaşyk gurallary, şeýle-de ekologiýa taýdan arassa önümçiligi, innowasiýa tehnologiýalaryny we nou-haulary girizmek ýaly meseleler ara alnyp maslahatlaşyldy.
5. Beýik Watançylyk urşunyň gahrymanlarynyň hormatyna Türkmenistanda guralýan çäreleriň çäklerinde «Türkmenaragatnaşyk» agentliginiň edara-kärhanalarynda zähmet çeken uruş weteranlaryna Türkmenistanyň Prezidentiniň adyndan gül çemenleri, pul sylaglary we gymmat bahaly sowgatlar gowşuryldy. Aragatnaşyk pudagynda onlarça ýyl zähmet çeken Walentina Žerdowa we Marguşa Aýriýewa urşa gatnaşanlaryň we onda wepat bolanlaryň maşgalalarynyň abadançylygy barada yzygiderli aladasy we olaryň abadan ýaşamagy üçin döredýän ähli şetleri üçin Türkmenistanyň Prezidentine alkyş sözlerini aýtdylar.
6. 5-6-njy iýunda Arkadag şäherinde geçiriljek «Energetikany ösdürmegiň geljegi, täze tehnologiýalar we uglewodorod ýataklaryny özleşdirmegiň ekologik taraplary» atly halkara ylmy-amaly maslahat geçiriler. Bu çäre nebitgaz pudagynyň öňdebaryjy hünärmenlerini, alymlary we halkara guramalarynyň wekillerini bir ýere jemläp, energetikanyň geljegi bilen baglanyşykly möhüm meseleleri ara alyp maslahatlaşmak üçin meýdança bolup çykyş eder. Maslahat adaty we onlaýn görnüşde geçiriler. Gatnaşyjylar üçin hasaba alyş işleri häzirki wagtda açykdyr.
Dünýäde
7. 8-nji maýda Moskwada geçirilen Ýewraziýa Ykdysady Bileleşiginiň ýubileý sammitinde Gazagystanyň Prezidenti Kasym-Žomart Tokaýew gurama agza döwletleri Merkezi Aziýa bilen Aýlag ýurtlarynyň arasyndaky ulag geçelgesine goşulmaga çagyrdy. Gazagystan Ýewraziýa Ykdysady Bileleşiginiň agza döwletlerini Aýlag ýurtlarynyň bazarlaryna girmek üçin, halkara ulag geçelgesini döretmek baradaky Aşgabat Ylalaşygyna goşulmaga çagyrýar. Biz eýýäm bu ylalaşyga goşuldyk – diýip, Tokaýew belledi. Onuň bellemegine görä, uzak möhletleýin integrasiýany ýola goýmagyň esasy şerti daşarky bazarlar bilen durnukly ulag aragatnaşygynyň bolmagydyr.
8. Londonyň iň gadymy erkek jentlmenler kluby «Garrick» 193 ýyllyk taryhynda ilkinji gezek zenanlara gapylaryny açdy. Bu çözgüt klubuň agzalary tarapyndan kabul edildi, olaryň hatarynda patyşa Karl III, Sting we Benedikt Kamberbetç bar. Ýaňy-ýakynda hem zenanlar diňe çakylyk esasynda we erkekleriň ýoldaşlyk etmeginde «Garrick» klubyna baryp bilýärdiler. Şeýle-de bolsa, 2024-nji ýylyň mart aýynda meşhur zenan hukukçylaryň topary bu köne syýasatyň üýtgedilmegini talap edip çykyş etdi. Olaryň başlangyjy goldaw tapdy. Klubuň agzalarynyň 60%-e golaýy düzgüniň üýtgemegini goldap ses berdiler.
Sport habarlary
9. «Baýer» Ýewropa ligasynyň ýarym finalynyň jogap duşuşygynda «Roma» bilen deňme-deň oýnady we iki oýnuň jemi boýunça ýaryşyň finalyna çykdy. Duşuşyk Lewerkuzen şäherinde geçirildi we 2:2 hasabynda tamamlandy. «Baýer» şu möwsümde asla ýeňlişe sezewar bolmady. Ispaniýaly tälimçi Habi Alonsonyň ýolbaşçylygyndaky topar 49 oýun bäri ýeňilmän gelýär. «Baýer» Ýewropa ligasynyň finalynda «Atalanta» bilen duşuşar. «Atalanta» iki oýnuň jemi boýunça Fransiýanyň «Marsel» klubundan üstün çykdy. Ýewropa ligasynyň häzirki çempiony Ispaniýanyň «Sewilýa» toparydyr. Ýaryşyň şu ýylky finaly 22-nji maýda Dublin şäherinde geçiriler.
10. Konferensiýalar ligasynyň finalçylary hem kesgitlendi. Olar Gresiýanyň «Olimpiakos» we Italiýanyň «Fiorentina» toparlary boldy. Pireýiň kluby ýarym finalda Angliýanyň «Aston Willasyny» ýeňlişe sezewar etdi, «Fiorentina» bolsa Belgiýanyň «Brýugge» toparyndan üstün çykdy. Konferensiýalar ligasynyň şu ýylky finaly 29-njy maýda Afiny şäherinde geçiriler.
