Merkezi Aziýa ýurtlary Aşgabat şäherinde geçirilen maslahatda suw meselesini ara alyp maslahatlaşdylar, Türkmenistanyň demirgazyk sebitinde täze ýaşaýyş toplumyny ulanmaga bermäge taýýarlyk görülýär, «Galkynyş» milli at üstündäki oýunlar topary dünýäde deňi-taýy bolmadyk täze tilsim taýýarlaýar we beýleki habarlar
Türkmenistanda
1. Aşgabatda Ýeri goramagyň gününe gabatlanylyp, Merkezi Aziýa ýurtlarynyň suw hojalyk meseleleri boýunça sebit maslahaty geçirildi. Çäre Suw serişdeleri we daşky gurşaw boýunça sebit taslamasyny durmuşa geçirmegiň çäklerinde geçirildi. Maslahata Türkmenistanyň, Gazagystanyň, Gyrgyzystanyň, Täjigistanyň, Özbegistanyň suw hojalyk pudaklarynyň, ministrlikleriniň, pudaklaýyn dolandyryş edaralarynyň we ylmy-barlag guramalarynyň, şeýle hem halkara düzümleriň wekilleri gatnaşdylar.
2. Türkmenistanyň Daşoguz welaýatynda halkara howa menziline barýan awtoulag ýolunyň ugrunda täze ýaşaýyş toplumynyň birinji tapgyrynyň gurluşygy tamamlaýjy tapgyrda alnyp barylýar. Giň öýli onlarça ýaşaýyş jaýy ulanmaga taýyn, şeýle hem mekdep we çagalar bagy guruldy. Birnäçe kilometr inženerçilik torlary geçildi, awtomobil ýollary we pyýada geçelgeler guruldy. Gurluşyk işleri tamamlanandan soň, ýaşaýyş toplumy jemi 1496 öýli 70 sany dört gatly binadan ybarat bolar.
3. «Galkynyş» milli at üstündäki oýunlar topary täze çykyşlaryň üstünde yzygiderli işleýär, halky geň galdyrmaga we rekord goýmaga synanyşýar. Topar indi çapyp barýan iki atyň aşagyndan geçmäge ünsi jemleýär, bu dünýäniň sirk tejribesinde ilkinji şeýle tilsim bolar. Tilsimiň kynlygy ahalteke atlarynyň ýyndamlygyndadyr.
4. 2025-nji ýylda täze «Wladimir Žirinowskiý» atly syýahat gämisi Hazaryň kenarynda ýerleşýän bäş döwleti – Türkmenistany, Russiýany, Azerbaýjany, Eýrany we Gazagystany birleşdirýän ugur boýunça hereket edip başlar. Astrahanyň «Lotos» gämi zawodynda gurulýan dört palubaly gämi 2024-nji ýylda ulanylmaga berler. 2025-nji ýylda bu gäminiň Wolga derýasyna hem-de Hazar deňziniň kenarýakalaryna syýahatçylyk saparlaryny guramakda ulanylyp başlanmagyna garaşylýar.
5. Şu günler Aşgabatda Türkmenistanyň Gyzyl Ýarymaý Milli jemgyýetiniň hem-de Gyzyl Haç we Gyzyl Ýarymaý jemgyýetleriniň Halkara federasiýasynyň wekilleriniň gatnaşmagynda okuw maslahaty geçirilýär. Çäräniň maksatnamasynyň çäklerinde birnäçe mejlisler geçiriler. Olaryň birinjisi krizis ýagdaýynda netijeli täsir guraly hökmünde nagt-wauçer kömeginiň maksatnamasynyň tanyşdyrylmagyna bagyşlanar. Şeýle hem oňa gatnaşyjylar beýleki ýurtlaryň Gyzyl Haç we Gyzyl Ýarymaý jemgyýetleriniň hereketleriniň meýilnamalary bilen tanyşarlar.
6. Lebap welaýatynyň Türkmenabat şäherinde Suw hojalyk meseleleri boýunça bilelikdäki türkmen-özbek hökümetara toparynyň nobatdaky mejlisi geçirildi. Oňa iki goňşy ýurduň döwlet düzümleriniň birnäçesiniň ýolbaşçylary we wekilleri gatnaşdylar. Taraplar ileri tutulýan ugurlarda özara gatnaşyklaryň okgunly ösýändigini nygtap, oba we suw hojalygy pudagynda netijeli hyzmatdaşlygy dowam etdirmäge taýýardyklaryny tassykladylar. Şunda suw serişdelerini rejeli ulanmak meselelerine aýratyn üns berildi.
Dünýäde
7. Izmirde bir ýaşaýjy öňki söýgülisinden ar almak üçin özboluşly bir usul tapdy. Ol şäherdäki dürli restoranlardan nahary gyzyň salgysyna eltip bermek we sargydy alandan soň tölemek şerti bilen 50 sany aýratyn sargyt etdi. Ady aýan edilmedik ýigit söýgülisi bilen aýrylyşandan soň uzak wagtlap ejir çekdi. Ol köp sanly telefon belgisini satyn aldy we olaryň hersinden öňki söýgülisiniň salgysyna eltilmegi üçin nahar sargyt etdi. Şol bir salga gelen betbagt çaparlar lapykeçlik bilen ýüzbe-ýüz bolmaly boldular. Gyz jaňlara jogap bermedi ýa-da gapyny açmady.
8. Gyrgyzystanyň paýtagtynda şäheriň 146 ýyllygy mynasybetli «Y» harpynyň dünýädäki ilkinji ýadygärligi açyldy. Rus elipbiýiniň 29-njy harpynyň ýadygärligi «Yntymak» seýilgähinde oturdyldy. Sungat eserini döretmek başlangyjy «Rossiýskaýa gazeta» tarapyndan öňe sürüldi we Bişkek şäher häkimligi bu pikiri höwes bilen goldady. Awtorlaryň pikiriçe, ýadygärlik diňe bir seýilgähiň bezegi bolman, eýsem, Gyrgyzystan hakda interaktiw maglumat çeşmesine öwrüler. Onda ýerleşdirilen QR kody bilesigeliji myhmanlara ýurduň taryhy, medeniýeti, geografiýasy barada esasy maglumatlary öwrenmäge, şeýle hem gysga rus-gyrgyz sözlügi bilen tanyşmaga mümkinçilik berer.
Sport habarlary
9. Çempionlar ligasynyň ýarym finalynyň ilkinji duşuşygynda «Bawariýa» bilen «Real» deňme-deň oýnadylar. Mýunhen şäherinde geçirilen duşuşyk 2:2 hasabynda tamamlandy. Duşuşykda ýer eýeleriniň gollaryny Leroý Sane (53-nji minut) bilen Garri Keýn (57) geçirdi. «Realda» bolsa Winisius iki gezek tapawutlandy (24, 83). Şu gün ýaryşyň beýleki ýarym finalynda Fransiýanyň «PSŽ» topary bilen Germaniýanyň «Borussiýa» topary duşuşar. Çempionlar ligasynyň final duşuşygy 1-nji iýun güni Londonyň «Uembli» stadionynda geçiriler. Ýaryşyň häzirki çempiony Angliýanyň «Mançester Siti» toparydyr.
10. Stol tennisi Türkmenistanda ýylsaýyn meşhurlyk gazanýar. Bu ýyl tutuş ýurt boýunça bu sportyň muşdaklary Bütindünýä stol tennisi gününi bellediler. Aşgabatda uly baýramçylyk çäresi geçirildi. Oňa sport mekdeplerinden 60 ýaş türgen we 10 tälimçi gatnaşdy. Türkmenistanyň Stol tennisi federasiýasynyň başlygy AgamyraT Allanazarow ýurduň ýaşlarynyň arasynda bu sporta bolan gyzyklanmanyň artýandygyny kanagatlanma bilen belläp, onuň mundan beýläk-de ösjekdigine ynam bildirdi. Dabara gatnaşanlaryň hemmesine ýadygärlik sowgatlar we diplomlar gowşuryldy.
