Türkmenistan 2 müň tonna möçberdäki suwuklandyrylan gazy Gyrgyzystana muzdsuz iberer, Serdar Berdimuhamedow Aşgabadyň prokuroryny wezipesinden boşatdy, Türkmenistanyň Ministrler Kabinetiniň nobatdaky mejlisi geçirildi we beýleki habarlar
Türkmenistanda
1. Türkmenistan 2 müň tonna möçberdäki suwuklandyrylan gazy ynsanperwer kömegi hökmünde Gyrgyz Respublikasyna muzdsuz iberer. Gyrgyz Respublikasynyň energetika ulgamynda ýüze çykan ýagdaýlary nazara alyp, Prezident Serdar Berdimuhamedow anna güni degişli Buýruga gol çekdi.
2. Türkmenistanyň Prezidenti, Türkmenistanyň Ýaragly Güýçleriniň Belent Serkerdebaşysy Serdar Berdimuhamedowyň Permany bilen, «Türkmenistanyň prokuraturasy hakynda» Türkmenistanyň Kanunynyň 16-njy maddasyna laýyklykda, ýustisiýanyň geňeşçisi Öwezmämmet Şyhmämmedow gulluk borçlaryny talabalaýyk ýerine ýetirmän, işde goýberen düýpli kemçilikleri üçin, Aşgabat şäheriniň prokurory wezipesinden boşadyldy.
3. 5-nji fewralda Aşgabatda Hytaý Halk Respublikasynyň Türkmenistandaky Medeniýet ýylynyň ýapylyş dabarasy bolar. Dabara Döwlet medeniýet merkeziniň Mukamlar köşgünde geçiriler.
4. Türkmenistanyň paýtagtynda Magtymguly Pyragy medeni-seýilgäh toplumynyň we beýik türkmen şahyrynyň ýadygärliginiň açylyş dabarasyna taýýarlyk görülýär. Prezident Serdar Berdimuhamedowyň tabşyryklaryna laýyklykda, bu toplumyň çäginde daşary ýurtlaryň meşhur şahsyýetleriniň, görnükli ýazyjy-şahyrlarynyň we söz ussatlarynyň heýkellerini oturtmak meýilleşdirilýär.
5. 2024-nji ýylyň mart-aprel aýlarynda Türkmenistanda birnäçe möhüm halkara çäreler – mekdep okuwçylarynyň we talyplaryň arasynda olimpiadalar, ylmy-amaly maslahat we sergi geçiriler.
6. Türkmenistanyň Ministrler Kabinetiniň ýanyndaky Ulag we kommunikasiýalar agentligi demirýol ulagynyň desgalaryny döwrebaplaşdyrmagy meýilleşdirýär. Hususan-da, daşky gurşawy goramak babatda ähli şertleri nazara almak bilen, ýurduň demir ýol stansiýalarynda hereket edýän infrastruktura desgalarynyň durkuny täzelemek, täzelerini gurmak meýilleşdirilýär.
7. Türkmenistanyň Ministrler Kabinetiniň nobatdaky mejlisinde ahalteke bedewleriniň tohum arassalygyny gorap saklamagyň we olaryň baş sanyny köpeltmegiň meseleleri ara alnyp maslahatlaşyldy. «Türkmen atlary» döwlet birleşiginiň Arkadag şäherinde bina edilen Atçylyk ylmy-önümçilik merkeziniň barlaghanasynda ahalteke atlarynyň arassa ganlylygyny gorap saklamak maksady bilen, atlaryň genetiki seljerme işleriniň geçirilýändigi bellenildi. Ýurduň atçylyk hojalyklarynda şu ýylda doglan ýaş taýlary tohumçylyk hasabyna almak, olara ýörite şahadatnamalary bermek boýunça degişli işler dowam edýär.
8. Alymlar akylly adamyň tapawutly alamatlaryny bellediler. Groningen uniwersitetiniň alymlary kagyzlar bilen dolup duran stoluň aýdyň pikirlenmek we adaty bolmadyk ideýalary döretmek ukybyny görkezýändigini aýdýarlar. Psihologlar ýokary akyl işjeňliginiň başga bir alamaty hökmünde ýerlikli degişmek ukybyny atlandyrýarlar.
9. Birleşen Arap Emirliklerinden inžener-mehanik Nora Al Matruşi 2024-nji ýylyň martynda NASA-nyň maksatnamasy boýunça okuwlary tamamlar. Ol BAE-niň ilkinji zenan kosmonawty bolar we kosmos missiýalaryna, şol sanda Halkara kosmos stansiýasyna uçuşlara we «Artemida» atly Aý taslamasyna gatnaşar.
Sport habarlary
10. Türkmenistanyň milli ýygyndysynyň ýarymgoragçysy Ruslan Mingazow Lionel Messiniň «Inter Maýami» topary bilen boljak ýoldaşlyk duşuşygyna gatnaşar. Mingazow «Gonkongyň ýyldyzlarynyň» düzüminde çykyş eder. Duşuşyk 4-nji fewralda Gonkongyň 40 müň tomaşaçy üçin niýetlenen milli stadionynda geçiriler. Ýatlatsak, Ruslan Mingazow 2022-nji ýylyň martynda «Kitçi» toparyna geçmek bilen, Gonkongda ilkinji türkmen legioneri boldy. Ýarymgoragçy 2023-nji ýylda Gonkongyň Premýer-ligasynyň iň gowy oýunçysy diýlip ykrar edildi.
11. Agyr atletika boýunça Türkmenistanyň erkekler we zenanlar ýygyndysynyň tälimçiler düzümi 3 — 10-njy fewral aralygynda Özbegistanyň Daşkent şäherinde geçiriljek agyr atletika boýunça Aziýa çempionatynda ýurda wekiliçilik etjek türgenleri kesgitlediler. Aziýa çempionaty Parižde geçiriljek Olimpiýa oýunlaryna gatnaşmak üçin saýlama ýaryşdyr we türkmen türgenlerine zerur bolan reýting utuklaryny toplamaga mümkinçilik berer.
12. Türkmenistanyň «Ahal» futbol topary Antalýa (Türkiýe) geldi we bu ýerde türgenleşik ýygnanyşygynyň çäklerinde işlere girişdi. Bu ýere gelenlerinden soň anna güni Serdar Geldiýewiň topary irden türgenleşik geçirdi. 4-nji martda başlajak 2024-nji ýyldaky Türkmenistanyň çempionatyna taýýarlyk görmek üçin «Ahalyň» futbolçylary Türkiýede birnäçe synag oýunlaryny oýnarlar. Olaryň biri 3-nji fewralda «Obolon» topary, beýlekisi 8-nji fewralda «Aleksandriýa» bilen geçiriler.
