Her ýylyň 19-njy fewralynda bellenilýän Deňiz süýdemdirijileriniň bütindünýä güni mynasybetli Türkmenistanda surat çekmek boýunça bäsleşik yglan edildi. Bäsleşige hödürleniljek suratlaryň mowzugy deňiz süýdemdirijileri bolar.
Bäsleşige gatnaşmaga 6 — 15 ýaş aralygyndaky çagalar we ýetginjekler çagyrylýar. Bäsleşigiň maksady deňiz süýdemdirijilerini gorap saklamagyň meselelerine ýaş nesliň ünsüni çekmekden ybarat diýip, «Türkmenistan: Altyn asyr» internet neşiri ýazýar.
Bäsleşige hödürlenjek işler A3 ölçegli kagyza islendik şekillendiriş usulynda çekilip bilner we awtor baradaky maglumatlar (FAA, ýaşy, eseriň ady, habarlaşmak üçin maglumatlary) bilen birlikde berilmelidir.
Suratlar 1-nji fewraldan 10-njy fewrala çenli şu salgyda kabul edilýär: Aşgabat şäheri, Azady köçesi, 61-nji bina, «Ylym» neşirýaty.
Bäsleşik «Ýaş tebigatçy» jemgyýetçilik guramasy hem-de Türkmenistanyň Magtymguly adyndaky Ýaşlar Guramasynyň Merkezi geňeşiniň ýanyndaky Çagalar gaznasy tarapyndan guralýar.
«Bäsleşik çagalara we ýetginjeklere deňiz süýdemdirijileri barada köp zatlary öwrenmäge we olary goramagyň zerurlygy barada pikirlenmäge kömek eder diýip umyt edýäris» – diýip, «Ýaş tebigatçy» jemgyýetçilik guramasynyň ýolbaşçysy Leýli Şyhmädowa belleýär.
Bäsleşigiň ýeňijileri 15-nji fewralda yglan ediler. Iň gowy 10 eseriň awtorlary Hazar döwlet tebigy goraghanasyna gezelenç etmäge mümkinçilik alarlar. Bäsleşige gatnaşyjylaryň ählisine şahadatnamalar we ýadygärlik sowgatlar gowşurylar diýlip, çeşmede bellenilýär.
