Türkmenistanyň Prezidenti Ministrler Kabinetiniň nobatdaky mejlisini geçirdi, Mary welaýatynda türkmen halkynyň Milli Lideriniň amala aşyran iş saparynyň jemi jemlendi we beýleki habarlar
Türkmenistanda
1. Türkmenistanyň Prezidenti Serdar Berdimuhamedow Ministrler Kabinetiniň nobatdaky mejlisini geçirdi. Onda ýurdy ösdürmegiň ileri tutulýan ugurlary ara alnyp maslahatlaşyldy. Mejlisiň dowamynda durmuş maksatly desgalaryň gurluşygy, medeniýet we sungat, senagat we oba hojalygy ulgamlaryny ösdürmek bilen baglanyşykly meseleleriň üstünde durlup geçildi. Şeýle hem halkara hyzmatdaşlygyň we ulag infrastrukturasyny ösdürmegiň meýilnamalary ara alnyp maslahatlaşyldy.
2. Prezident Serdar Berdimuhamedow Karara gol çekdi. Resminama laýyklykda, Ahal welaýatynyň häkimligine Ahal welaýatynyň Ak bugdaý etrabynyň Bokurdak şäherçesinde 1200 orunlyk döwrebap umumybilim berýän mekdebiň we 120 orunlyk umumy ýaşaýyş jaýynyň taslamasyny düzmek hem-de ony ýanaşyk ýerlerini abadanlaşdyryp gurmak barada «Baýly gurluşyk» hususy kärhanasy bilen şertnama baglaşmaga ygtyýar berildi. Kararda gurluşyk işlerine 2024-nji ýylyň ýanwar aýynda başlamak hem-de desgalary 2024-nji ýylyň sentýabr aýynda ulanmaga doly taýýar edip tabşyrmak bellenildi.
3. Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow Mary welaýatyna iş saparynyň çäklerinde sebitiň baş metjidine bardy.
- Soňra Halk Maslahatynyň Başlygy harby howa menziliniň işi, bu ýerde bar bolan uçarlary we dikuçarlary gözden geçirdi, şeýle hem harby uçarmanlaryň gulluk hem-de durmuş şertleri bilen gyzyklandy. Ondan soňra türkmen halkynyň Milli Lideri Garagum sährasynyň jümmüşinde ýerleşýän maldarçylyk hojalygynyň öri meýdanlaryna bardy. Öri meýdanda kärendeçi çopan öz ogly hem-de agtygy bilen Halk Maslahatynyň Başlygyny mähirli garşyladylar. Gurbanguly Berdimuhamedow çopanyň alyp barýan işi, dowarlaryň we bu ýerdäki öri meýdanlaryň ýagdaýy, şeýle hem onuň durmuşy bilen gyzyklandy.
- Halk Maslahatynyň Başlygy saparynyň ahyrynda Aşgabat — Türkmenabat ýokary tizlikli awtomobil ýolunyň Tejen — Mary böleginiň gurluşygynyň dowam edýän ýerine bardy. Ýolgurluşyk inženeri döwlet tarapyndan goldaw berilmegi netijesinde, gurluşyk işleriniň ýokary depginde dowam edýändigini aýtdy. Häzirki wagtda Tejen — Mary böleginiň gurluşygy tamamlaýjy tapgyrda alnyp barylýar, şeýle hem ýoluň Mary – Türkmenabat böleginiň gurluşygyna başlanyldy.
4. Türkmenistanyň BMG-niň Ženewadaky edarasynyň ýanyndaky hemişelik wekili Wepa Hajiýew BMG-niň bu edarasynyň ýolbaşçysyna ynanç hatyny gowşurdy. Dabaranyň çäklerinde duşuşyk geçirildi, onuň dowamynda taraplar mundan beýläkki hyzmatdaşlygyň meselelerini ara alyp maslahatlaşdylar. Türkmenistan BMG-niň gymmatlyklaryna we ýörelgelerine ygrarlydygyny, şeýle hem halkara giňişliginde öňe sürlen başlangyçlary durmuşa geçirmek üçin ýakyn hyzmatdaşlygy dowam etdirmäge taýýardygyny tassyklady.
Dünýäde
5. Hytaýda täze gastronomik trend: gap-gaç ýuwulýan sürteçleriň (gubkalaryň) şekilindäki tortlar ýüze çykdy. Olar şeýle bir tebigy görünýär welin, hakyky sürteçler bilen bulaşdyrylyp bilner. Tortlar boýaglar goşulan adaty biskwitlerden taýýarlanýar. Sabyn köpürjigine we ýuwujy serişdelere meňzetmek üçin ýumurtganyň agy bilen garylan şeker we sirop ulanylýar.
6. «Dostlar» atly amerikan teleserialynyň iki bölüminiň zibil gutusyndan tapylan ssenariýalary auksionda 22 müň funt sterlinge satyldy. Bu lotlaryň ilkibaşda bellenen bahasyndan, ýagny 600-800 funtdan 30 esse köpdür. Ssenariýalaryň satyjysy 90-njy ýyllarda studiýada işlän britaniýaly pension aýaldyr. Ol 25 ýyl ozal zibile taşlanan ssenariýaly bukjalary tapyp, stolunyň çekmesine salyp goýupdyr. Haçan-da ol 1999-njy ýylda studiýadan işden çykanda, ssenariýalar onuň çekmesinde galypdyr.
Sport habarlary
7. Kataryň milli ýygyndysynyň futbolçylary Aziýa kubogynyň açylyş oýnunda Liwanyň toparyndan ynamly üstün çykdylar. El-Haure şäherindäki «Al-Baýt» stadionynda geçirilen duşuşyk ýaryşyň ýer eýeleriniň peýdasyna 3:0 hasabynda tamamlandy. «A» toparçanyň indiki oýnunda katarlylar Täjigistanyň topary bilen, Liwanyň milli ýygyndysy bolsa hytaýly futbolçylar bilen duşuşar.
8. Aşgabat wagty bilen 13-nji ýanwardan 14-nji ýanwara geçilýän gijede Melburnda möwsümiň ilkinji «Uly tuwulga» ýaryşy – tennis boýunça Awstraliýanyň Açyk çempionaty başlaýar. Ýaryşyň ilkinji gününde häzirki çempionlar – belarusly Arina Sobolenkonyň we serbiýaly Nowak Jokowiçiň oýunlary geçiriler. Awstraliýanyň Açyk çempionaty 14 – 18-nji ýanwar aralygynda geçiriler. Bu ýylky baýrak gaznasy 57,8 million dollardan gowrak bolup, bu geçen möwsümiň baýragynyň umumy mukdaryndan 13 göterim köpdür.
