Türkmenisytanyň Döwlet daşary ykdysady iş banky bilen BAE-niň iň iri banky, dünýäniň iň ygtybarly we iri banklarynyň biri bolan «First Abu Dhabi Bankyň» (FAB) arasynda hyzmatdaşlyk etmek hakynda Ylalaşyga gol çekildi.
Agzalan maliýe düzümleriniň arasyndaky hyzmatdaşlygy güýçlendirjek we iki ýurt üçin geljegi uly mümkinçilikleri açjak bu möhüm resminama türkmen halkynyň Milli Lideri Gurbanguly Berdimuhamedowyň 4-5-nji ýanwarda Birleşen Arap Emirliklerine amala aşyran saparynyň dowamynda gol çekişildi.
Resminama türkmen tarapyndan Türkmenisytanyň Döwlet daşary ykdysady iş bankynyň başlygy Rahymberdi Jepbarow, emirlikler tarapyndan bolsa «FAB-yň» dolandyryş geňeşiniň agzasy Mohamed Saif Al Suwaýdi gol goýdy. Ylalaşyk bu iki bankyň dürli ugurlarda hyzmatdaşlyk etmegi üçin berk hukuk binýadyny döredýär.
«Ylalaşyk ykdysady bähbitleri öňe sürmek we durnukly ösüşi höweslendirmek babatdaky umumy borçnamalaryň esasynda dowam edýän hyzmatdaşlygy aňladýar» diýlip, «FAB-yň» bu baradaky metbugat beýannamasynda aýdylýar.
