15-nji dekabrda Türkmenistanyň Prezidenti Serdar Berdimuhamedow sanly ulgam arkaly Ministrler Kabinetiniň nobatdaky mejlisini geçirdi. Onda öňde boljak halkara çärelerden başlap, milli ykdysadyýeti döwrebaplaşdyrmagyň meýilnamalaryna çenli döwlet durmuşynyň ileri tutulýan meseleleri ara alnyp maslahatlaşyldy. Saglygy goraýyş, bilim, söwda, senagat we ulag ulgamlary aýartyn üns merkezinde boldy.
Öňde boljak çäreler
18-nji dekabrda Türkmenistanyň wekiliýeti Brýussel şäherinde geçiriljek Adam hukuklary boýunça «Türkmenistan — Ýewropa Bileleşigi» dialogyna gatnaşar.
19-njy dekabrda türkmen wekiliýeti Brýussel şäherinde geçiriljek «Türkmenistan — Ýewropa Bileleşigi» bilelikdäki toparyň 22-nji duşuşygyna gatnaşar.
27-nji dekabrda Türkmenistanyň Söwda-senagat edarasynda ýaşlaryň dabaraly maslahaty we sergisi geçiriler. Bu dabarada türkmen ýaşlarynyň halkara sport ýaryşlarynda, mekdep we talyp olimpiadalarynda gazanan üstünlikleriniň jemi jemlener. Şeýle hem ýaşlaryň ykdysadyýetiň dürli ugurlarynda ýeten sepgitlerine garalar.
29-30-njy ýanwarda Türkmenistan Brýusselde geçiriljek Ulag ulgamynda maýa goýum forumyna gatnaşar.
2024-nji ýylyň dowamynda Türkmenistanda Änew şäheriniň 2024-nji ýylda «Türki dünýäniň medeni paýtagty» diýlip yglan edilmegi mynasybetli birnäçe halkara çäreler guralar.
Bilim
2024-2025-nji okuw ýylynda türkmen ýaşlary Hytaý Halk Respublikasynyň we Wengriýanyň ýokary okuw mekdeplerine bilim almaga iberiler. Ýaş oglanlar we gyzlar maglumat tehnologiýalary, saglygy goraýyş we lukmançylyk ylymlary, bilim, pedagogika ylymlary, oba hojalygy we oba hojalyk ylymlary, inženerçilik işi, tehnologiýalar, tehniki ylymlar, matematika we tebigy ylymlar ugurlary boýunça bilim alarlar.
Saglygy goraýyş
BMG-niň ýöriteleşdirilen düzümleri tarapyndan Türkmenistana saglygy goraýyş ulgamynda gazanylan üstünlikleri üçin güwänamalar berildi. Şolaryň hatarynda saglygy goraýşyň hyzmatlarynyň ählumumy gurşawynyň ýolunda ösüşi çaltlaşdyrmak boýunça möhüm tagallalary üçin BMG-niň Ösüş maksatnamasynyň güwänamasy, BSGG-niň Supramilli referens barlaghanasynyň (Gauting, GFR) degişli güwänamalary bar. Güwänamalar Aşgabatda geçiriljek ýaşlar forumynda gowşurylar.
Söwda
Täze ýyl baýramynyň ýakynlap gelendigi sebäpli Prezidenti Serdar Berdimuhamedow degişli düzümleriň ýolbaşçylaryna ýurduň bazarlarynda azyk harytlarynyň dürli görnüşleriniň bolelin, elýeterli bahalardan üpjün edilmegini tabşyrdy.
Sergi işi
Türkmenistanyň Hökümeti 2024-nji ýylda ministrlikler we pudaklaýyn dolandyryş edaralary tarapyndan meýilleşdirilen sergileri, ýarmarkalary, maslahatlary, festiwallary guramak boýunça teklip taýýarlaýar. Prezidenti Serdar Berdimuhamedow bu çärelerde ýurtda öndürilýän önümleri giňden mahabatlandyrmagy we olary häzirki döwrüň talaplaryna laýyk guramagy tabşyrdy.
Ulag
Türkmenistanyň Ministrler Kabinetiniň ýanyndaky Ulag we kommunikasiýalar agentligi şäheriçi, şäherýaka we şäherara awtobus ugurlary boýunça ýolagçylary gatnatmak hyzmatlaryny kämilleşdirmek maksady bilen, «Toyota» kompaniýasynyň kiçi we orta kysymly döwrebap ýolagçy awtobuslarynyň ýüzlerçesini satyn aldy.
Ýangyç-energetika toplumy
Türkmenistanyň Hökümeti tebigy gazy ibermegiň we peýdalanmagyň Kadalaryny kämilleşdirmek, şeýle hem ýangyç-energetika toplumynyň işiniň kanunçylyk-hukuk binýadyny berkitmek boýunça işleri alyp barýar.
Maliýe
Prezidenti Serdar Berdimuhamedow ykdysadyýet meseleleri boýunça wise-premýer Hojamyrat Geldimyradowa milli banklaryň kart ulgamyny kämilleşdirmegi we töleg kartlarynyň häzirki zaman görnüşleriniň girizilmegini dowam etdirmegi tabşyrdy.
Senagat
Türkmenistanyň gurluşyk-senagat toplumynyň kärhanalarynda öndürilýän önümleriň eksportynyň tertibini düzgünleşdirýän kadalaşdyryjy hukuk binýady kämilleşdirilýär.
